- तिलक राई
लेटाङ । लेटाङ नगरपालिका वडा नम्बर १ को पहाडी गाउँहरुमा नेपाल टेलिकमको नेटवर्कमा देखिएको समस्या समाधान भएको छ । लेटाङ १ स्थित आरुवोटेमा ४ वर्ष अघि नेपाल टेलिकमले टावर निर्माण गरिएको भएपनि लामो समयसम्म सञ्चालनमा नआउँदा स्थानीयवासीलाई सञ्चार सम्पर्क गर्न निकै समस्या हुने गरेको थियो ।
टावर निर्माण हुन थालेपछि सहज रुपमा कुराकानी गर्न सकिने भयो भन्दै खुशी भएका स्थानीवासी लामो समयसम्म टावर सञ्चालनमा नआउँदा निराश भएका थिए । तर पछिल्लो समय स्थानीय युवाहरुको पहलमा सञ्चार मन्त्रालयमा सम्पर्क गरि समस्या बारे जानकारी गराएपछि नेपाल टेलिकमले प्राविधिक पठाएर टावर सञ्चालनमा ल्याएपछि मंगलबारदेखि सञ्चार सम्पर्क गर्न सहज भएको छ । ढिलै भएपनि टावर सञ्चालमा आएपछि स्थानीयवासी हर्षित भएका छन् ।
लेटाङ १ का वडाध्यक्ष विष्णु मगरले सेवा सुचारु गरेकोमा नेपाल टेलिकमलाई धन्यवाद दिंदै प्रभावकारी रुपमा सेवा सञ्चालन गर्नुपर्नेमा जोड दिनुभयो । सो क्षेत्रमा नेपाल टेलिकमको टावर सञ्चालन नहुँदा एनसेलबाट मात्र सम्पर्क गर्नुपर्ने अवस्था थियो । जसका कारण स्थानीयवासीले निकै सास्ती भोग्नु परेको थियो । टावर सञ्चालना आएसँगै लेटाङको वडा नम्बर १, वडा नम्बर ७ को केही भाग तथा केराबारी गाउँपालिकाको २, ३ र ४ नम्बर वडाका वासिन्दा लाभान्वित हुनेछन् ।
