-तिलक राई
केराबारी । मोरङको केराबारी गाउँपालिका २ सिंहदेवीमा जारी प्रथम हिलेथाम फुटबल कप अन्तरगत आज शनिबार भएका खेलमा विजयी हुँदै साँगुरीगढी गाउँपालिका धनकुटा र कानेपोखरी गाउँपालिका मोरङ सेमीफाइनलमा प्रवेश गरेका छन् । शुक्रबारदेखि सुरु भएको प्रतियोगिता अन्तरगत आज शनिबार २ वटा क्वाटरफाइनल खेल खेलाइएको हो । पहिलो खेलमा साँगुरीगढीले लेटाङलाई २ का विरुद्ध ४ ले पराजित गर्दै सेमीफाइनलमा स्थान पक्का गरेको हो ।
यस्तै दोश्रो खेलमा आयोजक केराबारी गाउँपालिकालाई ० का विरुद्ध १ गोलले पराजित गर्दै कानेपोखरी गाउँपालिका सेमीफाइनलमा पुगेको छ । यसअघि शुक्रबार भएका २ वटा खेलमा विजयी हुँदै पथरी र मिक्लाजुङले सेमीफाइलनमा स्थान बनाइ सकेका छन् । अब फाइनल प्रवेशका लागि कानेपोखरीले मिक्लाजुङको र साँगुरीगढीले पथरीको सामना गर्नेछन् ।
पहिलो दिन भएका खेलमा पथरीले केराबारी गाउँपालिका निलो र मिक्लाजुङले चौविसे धनकुटालाई पराजित गर्दै सेमीफाइनलमा स्थान बनाइ सकेका छन् ।
हिलेथाम पर्यटन तथा खेलकुद विकास समिति केराबारी २ सिंहदेवीको आयोजनामा भएको प्रतियोगिताको उपाधि विजेताले ट्रफिसहित ७५ हजार र उपविजेताले ट्रफिसहित ५० हजार पाउने आयोजक समितिका अध्यक्ष विक्रम शाहीले जानकारी दिनुभयो ।
पर्यटन तथा खेलकुद क्षेत्रको विकास गर्ने उद्देश्यले आयोजना गरिएको प्रतियोगिताको मुख्य प्रायोजक केराबारी गाउँपालिका र वडा नम्रब २ रहेका छन् भने सिंहदेवी खेलकुद विकास समितिको समेत सहयोग रहेको छ । धनकुटा र मोरङका गरि ८ वटा टीम सहभागी प्रतियोगिताको फाइनल खेल फागुन २८ गते हुनेछ । खेल सञ्चालन हुनु अघि मनोरञ्जन प्रदान गर्नका लागि विभिन्न साँस्कृति नृत्यहरु समेत प्रस्तुत गर्ने गरिएको थियो ।
