लेटाङ । लेटाङ नगरपालिकाले सोह्रौँ नगरसभाको रुपमा चालु आर्थिक वर्षको हिउँदे नगरसभा सम्पन्न गरेको छ । आइतबार बसेको नगरसभाले चालु आर्थिक वर्षको बजेटमा केहि संशोधन गरेको छ । नगरसभामा नगर उपप्रमुख कृष्ण कुमारी निरौलाले लेटाङ नगरपालिकाको विनियोजन ऐन, २०८१ लाई संसोधन गर्न वनेको ऐन, २०८१ नगरसभामा प्रस्तुत गर्नुभयो ।
नगरसभाले केही योजनाको रकम संशोधान गरि नयाँ योजनामा लगाएको छ । जसमध्ये सबै भन्दा बढी कोल्डस्टोर निर्माणका लागि छुट्याइएको ५४ लाख ५० हजार रकम विभिन्न वडाका सडक मर्मतका लागि छुट्याइएको छ । नगरस्तरका कूल ५ करोड ९८ लाख ९४ हजारका योजना संशोधन गरिएकोमा कूल ६ करोड ४० लाख ११ हजार ३ सयका वडास्तरी योजना संशोधन गरिएको छ ।
नगरसभामा उपप्रमुख निरौलाले चालु आर्थिक वर्षको आय र व्यवको अवस्था बारे पनि जानकारी गराउनु भएको छ । चालु आर्थिक वर्षको ५ महिनामा नगरपालिकाले लक्ष्यको ५३ दशमलव ३ प्रतिशत आम्दामी गरेको जनाइएको छ । यता बजेट खर्चतर्फ भने केहि न्यून २३ दशमलव ५७ प्रतिशत मात्र बजेट खर्च गरेको छ ।
पन्ध्रौँ नगरसभाले कूल ६० करोड ८५ लाख ३७ हजार आय अनुमान गरेकोमा ५ महिनामा ५३ दशमलव ३ प्रतिशत अर्थात ३२ करोड ४३ लाख ३३ हजार ३ सय ११ रुपैयाँ आय गरेको छ । यसैगरि खर्चतर्फ ६० करोड ८५ लाख ३७ हजार अनुमान गरिएकोमा त्यसको २३ दशमलव ५७ प्रतिशत अर्थात १४ करोड ३४ लाख ५७ हजार ६ सय ३५ रुपैयाँ मात्र खर्च गर्न सकेको छ ।
यसैगरि नगरपालिकाले चालु आर्थिक वर्षमा गरेका महत्वपूर्ण कार्यहरु बारे पनि नगरसभामा जानकारी गराइएको छ । नगर प्रमुख तथा प्रमुख प्रशासकीय अधिकृतबीच तथा शाखा प्रमुख र प्रमुख प्रशासकीय अधिकृतबीच कार्य सम्पादन सम्झौता गर्ने अभ्यास सुरु गरिएको छ । यस्तै वडा कार्यालय तथा शाखाहरुको बार्षिक कार्ययोजना तथा कार्यतालिका निर्माण गरिएको छ । यस्तै नगरपालिकाले वडास्तरमा गई योजना सम्झौताका लागि अभिमुखिकरण कार्य सम्पन्न गरेको छ जनाएको । बहुबर्षिय र विषेश योजना बाहेकका नगरसभाले तय गरेका सवै योजनाहरु २०८२ बैसाख मसान्त भित्र सम्पन्न गर्ने नगरपालिकाले लक्ष्य राखेको छ ।
यसैगरि अफिस अटोमेसन प्रकृयामा गएको, दर्ता चलानी अनलाईन गरिएको, सार्वजनिक सम्पती ब्यवस्थापन प्राणाली/योजना सफ्टवेयर सिष्टम/राजश्व क्यू आर कोड मार्फत राजश्व भुक्तानी सहजिकरण /भुक्तानी ईएफटी प्रकृयावाट संचालित रहेको पनि जनाइएको छ । यस्तै लेटाङ–७ वाराङ्गीमा अस्थायी प्रहरी चौकी स्थापना गरिएको र सर्पदंश उपचार केन्द्र संचालनका लागि स्वीकृती प्राप्त भएको कुरालाई पनि नगरपालिकाले महत्वपूर्ण कार्यको रुपमा लिएको छ । नगरसभामा केही नगरसभा सदस्यले विभिन्न विषयमा विज्ञाशा राख्नु भएकोमा नगर प्रमुख भूपेन्द्र कुमार लावतीले त्यसको जवाफ दिनु भएको थियो ।
