-चन्दन रौनियार
सुनसरी । सुनसरीमा गैरपत्रकारहरुको पत्रकार महासंघ सदस्यता कायम राख्ने खेल भएको भन्दै प्रेस चौतारी सुनरीले कडा प्रतिकार गर्ने चेतावनी दिएको छ । शुद्धीकरणका सन्दर्भमा महासंघ सुनसरीले २४ घण्टा भित्र जवाफ नदिए महासंघ विरुद्ध तालाबन्दी गर्नसमेत बाध्य हुने र उत्पन्न परिस्थितिको जवाफदेही पत्रकार महासंघ सुनसरी हुने चौतारीले चेतावनी दिएको छ । शुद्धीकरण अभियानलाई कडाइका साथ खुट्टा नकमाई निष्पक्ष रूपमा लागु गर्न पत्रकार महासंघ सुनसरीलाई चौतारीले आग्रह गरेको छ । अन्यथा प्रेस चौतारी सुनसरी सशक्त आन्दोलनमा उत्रन बाध्य हुने अध्यक्ष सुभद्रा प्याकुरलेद्वारा जारी विज्ञप्तीमा उल्लेख गरिएको छ । बुधबार प्रेस विज्ञप्ति जारी गर्दै चौतारी सुनसरीले पत्रकार महासंघ सुनसरीका कार्यसमितिका केही व्यक्ति आफू निकटलाई जोगाउने र अरूलाई हटाउने लिस्ट बोकेर बलमिच्याइँ गरिरहेको आरोप लगाएको छ । चौतारी सुनसरीले विज्ञप्तिमा भनेको छ, ‘नेपाल पत्रकार महासंघ सुनसरी शुद्धीकरण अभियानमा सदस्यहरू छाँटकाँट गर्ने अभियानमा लागेको छ । तर विडम्बनाको कुरा के छ भने कार्यसमितिका केही व्यक्तिहरू आफू निकटकालाई जोगाउने र अरूलाई हटाउने लिस्ट बोकेर जुन बलमिच्याइँ गरिरहेका छन् त्यसले महासंघको अभियान शुद्ध हुने हामीले ठानेका छैनौं । हामी चाहान्छौं, शुद्धीकरण निष्पक्ष, स्वतन्त्र र तथ्य प्रमाणका आधारमा हुनु पर्छ ।’
पत्रकार महासंघको केन्द्रीय समितिको मापदण्डविपरीत एक पक्षीय ढंगले गरेको शुद्धीकरण किमार्थ स्वीकार्य नरहेको चौतारीले प्रेस विज्ञप्तिमार्फत् जानकारी गराएको छ । शुद्धीकरणप्रति आफुहरु पूर्ण सचेत रहेको बताउँदै चौतारी सुनसरीले नियमसंगत, आधार प्रमाण र तथ्यका आधारमा सुनसरी पत्रकार महासंघले सदस्यता शुद्धीकरण गर्न सकेन भने कडा प्रतिकार गर्ने जनाएको छ ।
नेपाल पत्रकार महासंघको सदस्यता शुद्धीकरण अभियानमा सुनसरीका कार्यसमिति सदस्य नै निकट भएकै कारण गैरपत्रकारलाई जोगाउने चलखेलमा लागेको प्रेस चौतारीले आरोप छ । केन्द्रको १५ बुँदे मापदण्ड अनुसार छाँटकाट हुनुपर्ने चौतारीको भनाइ छ । व्यापारी, कर्मचारी, निर्माण व्यवसायी, जग्गा व्यवसायी, शिक्षक, कर्मचारी, अध्यापक, औषधि व्यवसायीलाई महासंघमा सधैं फुलमाला लगाएर सदस्य राखी रहन आवश्यक नरहेको चौतारीले उल्लेख गरेको छ । प्रेस चौतारी नेपालमा आबद्ध भएर सक्रिय पत्रकारिता नगर्नेलाई सदस्यता त्यागको स्वघोषणा गर्न लगाइरहेको र गरिरहेको समेत चौतारीले स्मरण गराएको छ ।
