-राजु गौतम
लेटाङ । लेटाङमा जारी लेटाङ टी-ट्वान्टी त्रिकोणात्मक श्रृंखंला अन्तरगत दोस्रो खेलमा शनिबार युनाइटेड क्लब माथि ३६ रनको जित हासिल गर्दै त्रिवेणी राइनोज फाइनल नजिक पुगेको छ । शुक्रबार ह्याप्पी क्लबसँग पराजित भएको त्रिवेणीले आइतबार हुने ह्याप्पी क्लब र युनाइटेड क्लबको नतिजामा भर पर्नुपर्ने भएता पनि नेटरनरेटमा सुधार गरेकाले फाइनल नजिक पुगको हो ।
टस जितेर युनाइटेड क्लबले फिल्डिङ रोजेपछि पहिला ब्याटिङमा उत्रिएको त्रिवेणीले निर्धारित २० ओभरमा ६ विकेट गुमाउँदै १ सय ५२ रन बनाएको थियो । त्रिवेणीका लागि उत्तम ढकालले सर्वाधिक नटआउट ४६ रन र भोला राईले २३ रनको योगदान गरेका थिए । युनाइटेडका न्युटन विश्वास र विवस श्रेष्ठले समान २-२ विकेट हात पारेका थिए ।
१ सय ५२ रनको लक्ष्य लिएर जवाफि ब्याटिङमा उत्रिएको युनाइटेड क्लब १८/५ ओभरमा १ सय १६ रनमा अलआउट भएपछि त्रिवेणीले ३६ रनको सहज जित दताए गरेको हो । युनाइटेडका गौरव राईले सर्वाधिक २२ रन जोडेका थिए । त्रिवेणीका द्रोण मगरले सर्वाधिक ४ विकेट र प्रेम सागर दाहालले ३ विकेट हात पारेका थिए ।
ब्याटिङमा १३ रन, बलिङमा ४/१२ र फिल्डिङमा ५ क्याच लिन सफल त्रिवेणीका द्रोण मगर म्यान अफ द म्याच घोषित भए । आजको जितसँगै २ खेलमा २ अंक पाएको त्रिवेणी ±०.७३५ नेटरनरेटका साथ तालिकाको शीर्ष स्थानमा रहेको छ भने १ खेलमा १ हात पारेको ह्याप्पी क्लव ±०.३७१ नेटरनरेटका साथ दोस्रो र १ खेलमा ० अंक पाएको युनाइटेड -१.८०० नेटरनरेटका साथ पुछारमा रहेको छ ।
युनाइटेड क्लब, ह्याप्पी क्लब र त्रिवेणी राइनोजले संयुक्तरुपमा आयोजना गरेको प्रतियोगितालाई वडा नं ४ ले मुख्य प्रायोजन गरको छ भने विभिन्न व्यक्तिहरूले सहयोग गरेका छन् । ३ वटा टिमहरूको राउन्ड रोबिन लिगमा उत्कृष्ट २ टिम फाइनल पुग्ने फम्र्याटमा आयोजना भइरहेको प्रतियोगिता फागुन २८ गतेसम्म सञ्चालन हुनेछ । प्रतियोगिताको विजेताले ट्रफीसहित १५ हजार र उपविजेताले ७ हजार ५ सय प्राप्त गर्नेछन् ।
