लेटाङ । लेटाङ नगरपालिकामा न्यायीक समितिको इजलास निर्माण गरि सञ्चालनमा ल्याइएको छ । भर्खरै निर्माण सम्पन्न भएको इजलासको आज विहीबार लेटाङ नगरपालिकाका नगर प्रमुख भूपेन्द्र कुमार लावती र उपप्रमुख कृष्णकुमारी निरौलाले उद्घाटन गर्नभुयो । नगरपालिकाको न्यायीक समितिमार्फत हुने न्याय सम्पादनका क्रममा फैसला गर्नुपर्ने अवस्था आएमा इजलासको उपयोग गर्नुपर्ने हुन्छ । न्यायीक समिति संयोजक तथा नगर उपप्रमुखले कपितय विषयमा अदालतमा न्यायधिशले झैं निर्णय सुनाउन सक्ने व्यवस्था रहेको छ । सोहि व्यवस्था कार्यान्वयन गर्नका लागि इजलाश स्थापना गरिएको हो ।
नगरपालिकामा न्यायीक समितिले ७ वर्षदेखि न्याय सम्पादनको काम गर्दै आएकोमा हालसम्म इजलासबाट फैसला गरेर न्याय सम्पादन गर्नुपर्ने अवस्था भने आएको छैन । नगर उपप्रमुख कृष्ण कुमारी निरौलाले नगरपालिका परिसरमै २ तले नयाँ भवन निर्माण गरि इजलाश, गोप्य कक्ष र बैठककक्ष सहितका संरचना निर्माण गरिएकाले अब न्यायीक समितिको सेवा प्रवाहमा सहजता आउने बताउनुभयो ।
नगरपालिकाको २६ लाख ५७ हजार ४ सय १० रुपैयाँ लागतमा इजलाश भवन निर्माण सम्पन्न गरिएको नगरपालिकाका उपसचिव कृष्णराज राईले जानकारी दिनुभयो । शशी निर्माण सेवासँग २०७९ पौष २ गते ठेक्का सम्झौता भएकोमा २०८० कार्तीक २० गते भवन निर्माण सम्पन्न भएको उहाँको भनाइ छ ।
इजलासमा न्यायीक समिति संयोजक, २ जना न्यायीक समिति सदस्य, सम्बन्धित मेलमिलापकर्ता र विवादित पक्षका व्यक्तिहरु रहने व्यवस्था छ । नयँ भवन निर्माण गरि इजलाश, बैठक कक्ष र गोप्य कक्षको समेत व्यवस्थापन भएपछि न्यायीक समितिलाई सेवा प्रवाह गर्न सहज हुने भएको छ । यसअघि उपप्रमुखको सचिवालयबाटै न्यायीक समितिको सेवा तथा मेलमिलापको काम हुँदै आएको थियो ।
