धर्मदेवी । संखुवासभाको धर्मदेवी नगरपालिका वडा नम्बर ५ को सेवाप्रवाह आफ्नै नवनिर्मित भवनबाट सुरु गरिएको छ । हालसम्म याख्खाचोकस्थित वडा नम्बर ४ को कार्यालयबाटै वडा नम्बर ५ को समेत सेवा प्रवाह भइरहेकोमा धर्मदेवी ५ लाफाचोकस्थित मगरगाउँमा आफ्नै भवन निर्माण सम्पन्न गरि सेवादिन थालिएको हो ।
आर्थिक वर्ष ०८१।०८२ को पहिलो दिन श्रावण १ गतेदेखि नवनिर्मित भवनबाट सेवा सुरु गरिएको वडाध्यक्ष रामबहादुर मगरले जानकारी दिनुभयो । उहाँले निकै लामो समयपछि आफ्नै सुविधासम्पन्न भवनबाट सेवा प्रवाह सुरु गर्न पाउँदा खुसी लागेको पनि बताउनुभयो । भवनमा वडाध्यक्ष र वडासचिवको छुट्टा–छुट्टै कार्यकक्ष रहनुका साथै राजश्व, दर्ताचलानी लगायतका लागि समेत व्यवस्थित कक्ष भएकाले सेवा प्रवाह गर्न धेरै सहज भएको उहाँको भनाइ छ ।
वडा कार्यालय भवन निर्माणका लागि स्थानीय जग्गादाताहरु चेतबहादुर रानामगर, श्यामु रानामगर र मानबीर रानामगरले जग्गा उपलब्ध गराउनु भएको थियो । ४ वटा कोठा तथा शौचालय र बाथरूम समेत रहेको एकतले वडा कार्यालय भवन ३० लाख रुपैयाँ लागतमा निर्माण गरिएको वडाध्यक्ष मगरले जानकारी दिनुभयो ।
