लेटाङ । लेटाङ नगरपालिकाले नगर क्षेत्रमा फुटबल खेलाडी उत्पादन गरि खेल क्षेत्रको विकास गर्ने उद्देश्यका साथ १५ वर्षमुनिका छात्रछात्राहरुका लागि फुटबल खेलको प्रशिक्षण सुरु गरेको छ । लेटाङ नगरपालिकाको आयोजना तथा लेटाङ फुटबल क्लवको व्यवस्थापनमा १५ वर्षभन्दा मुनि १० वर्षसम्मका १ सय ८० जना छात्रछात्राहरुका लागि फुटबल खेलको प्रशिक्षण सुरु गरिएको हो ।
नगरपालिकाका विभिन्न ४ ठाउँमा १ महिनासम्म सञ्चालन हुने प्रशिक्षणको मंगलबार लेटाङ ४ स्थित जनसेवा खेल मैदानबाट शुभारम्भ गरिएको छ । लेटाङ नगरपालिकाका नगर प्रमुख भूपेन्द्रकुमार लावती, उपप्रमुख कृष्णकुमारी निरौला र लेटाङ ४ का वडाध्यक्ष रामकुमार श्रेष्ठले प्रशिक्षकलाई फुटबल हस्तान्तरण गर्दै प्रशिक्षणको शुभारम्भ गर्नुभयो ।
कार्यक्रममा बोल्दै नगर प्रमुख भूपेन्द्रकुमार लावतीले खेल खेलेर पैसा र नाम दुवै कमाउन सकिने भएकाले मेहनत गरे प्रशिक्षणमा सहभागी हुन प्रशिक्षार्थी खेलाडीहरुलाई आग्रह गर्नुभयो । उहाँले खेल क्षेत्रका सरोकारवालाहरुको सुझाव अनुशार १५ वर्ष मुनिका छात्रछात्राहरुका लागि प्रशिक्षण सञ्चालन गरिएको जानकारी दिँदै नगरपालिकाले प्रशिक्षणलाई आगमी वर्षपनि निरन्तरता दिंदै जाने बताउनुभयो ।
यस्तै लेटाङ नगरपालिकाकी नगर उपप्रमुख कृष्णकुमारी निरौलाले खेल सँगसँगै अध्ययनलाई पनि अगाडी बनाउन आग्रह गर्दै नगरपालिकाले पछिल्लो समय खेल क्षेत्रको विकासका लागि काम गरिरहेको जानकारी दिनुभयो ।
उहाँले भर्खरै नगर खेलकुद महोत्सव सम्पन्न गरेको स्मरण गर्दै खेल क्षेत्रको विकासका लागि नगरपालिकाले विभिन्न प्रशिक्षणहरु सञ्चालन गरेको बताउनुभयो । उहाँले फुटबलको प्रशिक्षणमा छात्राहरुको समेत उल्लेख्य सहभागिता देखिएकोमा खुशी व्यक्त गर्दै यो अवसरलाई सदुपयोग गर्न आग्रह गर्नुभयो ।
यसैगरि लेटाङ नगपालिकाको समाजिक विकास शाखा प्रमुख तथा लेटाङ ४ का वडाध्यक्ष रामकुमार श्रेष्ठले नगरपालिकाले सामुहिक रुपमा प्रशिक्षण सञ्चालन गरेर खेललाई व्यवसायिक रुपमा अघि बढाउन लागेको बताउनुभयो ।
लेटाङ फुटबल क्लवका अध्यक्ष इन्द्र राईले खेलाडीहरुलाई खेलेर पैसा कमाउन सक्ने खेलाडी बन्न आग्रह गर्दै अनुशासित भएर राष्ट्रिय अन्तराष्ट्रिय खेलाडी बन्ने गरि मेहनतका साथ प्रशक्षिणमा सहभागी हुन खेलाडीहरुलाई आग्रह गर्नुभयो ।
यस्तै मोरङ जिल्ला फुटबल रेफ्रि संघका वरिष्ठ उपाध्यक्ष माधव लिम्बूले हालसम्म १ सय ८ जनाले प्रशिक्षणका लागि नाम टिपाएकोमा १ सय ८० जनासम्मलाई सहभागी गराउन सकिने भएकाले चाँडो भन्दा चाँडो नाम टिमाउन इच्छुक खेलाडीलाई आग्रह गर्नुभयो ।
उहाँले लेटाङ–४ स्थित जनसेवा खेल मैदानबाट प्रशिक्षण शुभारम्भ गरिएकोमा, लेटाङ २ को खेलमैदान, लेटाङ ४ को प्याव्सन चौरी र लेटाङ ९ स्थित श्रीमाविको खेल मैदानमा गरि ४ ठाउँमा प्रशिक्षण सञ्चालन हुनेजानकारी दिनुभयो । प्रशिक्षण लिन चाहने खेलाडीहरुले आफुलाई पायक पर्ने नजिकैको खेल मैदानमा प्रशिक्षण लिन सक्ने व्यवस्था गरिएको उहाँको भनाइ छ ।
लेटाङ नगरपालिकाले पछिल्लो समय खेल क्षेत्रको विकासका लागि नगर स्तरीय खेलकुद महोत्सव सञ्चालन गर्नुका साथै विभिन्न खेल विधाका प्रशिक्षण सञ्चालन गर्दै आएको छ । भर्खरै महिला भलिवलको ३ महिने प्रशिक्षण सम्पन्न गरेको नगरपालिकाले मंगलबारदेखि १५ वर्ष मुनिका छात्रछात्राहरुका लागि निःशुल्क प्रशिक्षण सञ्चालन गरिरहेको छ ।
