मोरङ । पूर्व मेचीदेखि पश्चिम महाकालीसम्म पूर्वपश्चिम जोड्ने बैकल्पिक सडकको रुपमा निर्माणाधिन मदन भण्डारी राजमार्ग निर्माण कार्यमा ढिलासुस्ती भएको छ । सरकारबाट पर्याप्त बजेट व्यवस्थापन नहुँदा र जंगल क्षेत्रको रुख हटाउने विषयमा सरकारी निकायहरुबीच तालमेल नमिल्दा राजमार्गको जंगल क्षेत्रको काम अघि बढ्न सकेको छैन । अधिकांश गाउँबस्ती खण्डमा सडक निर्माण कार्य अघि बढेपनि जंगल क्षेत्रमा भने पुल र साना कल्बट बनाउने बाहेक अरु काम भएको छैन ।
मोरङको केराबारी लेटाङ मिक्लाजुङ खण्डको गाउँखण्डमा सडक निर्माण कार्य निकै अघि बढेपनि जंगल खण्डमा भने समस्या देखिएको छ । जंगल क्षेत्रमा पुलहरु निर्माण कार्य अन्तिम चरणमा पुगेको भएपनि रुख कटान नहुँदा सडक निर्माणमा भने ढिलासुस्ती भएको छ ।
धरान–केरावारी–लेटाङ–मधुमल्ला–बेलडाँगी सडकखण्डको ५३ किलोमिटर भित्र ५ हजार ७ सय ८९ वटा रुख पर्छन् । मदन भण्डारी राजमार्ग आयोजना दमक कार्यालयका सूचना अधिकारी सुभासकुमार दत्तका अनुसार आयोजनाले २०७९ चैत १० गते वन मन्त्रालयलाई रुख हटाइदिनु भनेर पत्राचार गरेको थियो ।
वन मन्त्रालयले समयमा रुख नहटाइदिँदा काम रोकिएको आयोजनाका प्रमुख गोपालप्रसाद खकुरेलको भनाइ छ । खकुरेलका अनुसार एकातिर प्रर्याप्त बजेटको अभाव छ भने अर्कोतर्फ रुख हटाउन वन मन्त्रालयले चासो नदेखाउँदा काममा ढिलासुस्ती भएको हो । उहाँका अनुसार ४ अर्व ६० लाख ६६ हजारमा ठेक्का लागेको सडकको हालसम्म १ अर्ब ५२ करोड १३ लाख ३६ हजार रुपैयाँ मात्र भुक्तानी भएको छ । त्यस्तै सडकमा पर्ने पुल निर्माण गर्न ६ अर्ब १२ करोड ६२ लाख ५४ हजार रुपैयाँमा ठेक्का लगाइएको थियो ।
आर्थिक वर्ष ०८०।०८१ मा आयोजनाका लागि सरकारले ४९ करोड रुपैयाँ मात्र विनियोजन गरेको उहाँको भनाइ छ । खकुरेलका अनुशार हाल भइरहेको काम र प्रगति विवरण हेर्दा आर्थिक वर्षको अन्त्यसम्ममा १ अर्ब ४५ करोड रुपैयाँ निर्माण कम्पनीहरूलाई दिनुपर्ने देखिएपनि श्रोतको सुनिश्चितता छैन ।
राजमार्ग निर्माणकाको काम सुरु भएको निकै वर्ष भइसक्दा समेत जंगल क्षेत्रमा काम अघि नबढ्दा समस्या भएको स्थानीय जनप्रतिनिधिहरुको भनाइ छ । लेटाङ नगरपालि उपप्रमुख कृष्णकुमारी निरौला अफुहरुले पटक पटक पहल गरेपनि जंगल क्षेत्रको काममा ढिलासुस्ती भएको गुनासो गर्नुहुन्छ । चालु अािर्थक वर्षमा सरकारले पर्याप्त बजेट व्यवस्थापन नगरेका कारण झन समस्या भएको उहाँको भनाइ छ ।
सडक क्षेत्रका रुख हटाउन कानूनी जटिलता हुनु र बजेटको सुनिश्चितता नहुँदा आयोजनाको ठेक्का अवधि थप हुने देखिएको छ । तत्कालिन केपी शर्मा ओली नेतृत्वको सरकारले मदन भण्डारी राजमार्ग निर्माण गर्ने घोषणा गरेपछि खुशी भएका यस क्षेत्रका वासिन्दा यतिबेला निराश भएका छन् । काम थालेको वर्षौं भइसक्दा समेत कामले गति नलिएपछि स्थानीयमा राजमार्ग नै नबन्ने होकी भन्ने आशंका उत्पन्न भएको छ ।
यता जिल्ला वन कार्यालय मोरङले भने भौतिक पूर्वाधार मन्त्रालयको दोहोरो कामले गर्दा रुख हटाउन कानूनी समस्या भएको जनाएको छ । मोरङका निमित्त डिभिजनल वन अधिकृत रामलखन ठाकुरले सुरुमा सडकको केन्द्र विन्दूबाट १०\१० मिटर दाँया÷बाँयाका रुख हटाउन पत्राचार गरिएकोमा पछि सडकको दाँयाबाँया १५ \१५ मिटरका रुख हटाउनु पर्ने भनेर सूचना आएको बताउनुभयो । उहाँका अनुशार पछि फेरि वनमा धेरै ठूलो क्षति हुने भन्दै पूर्ववत काम गर्न आयोजना तयार भएको थियो ।
समय–समयमा फरक फरक संख्यामा रुख हटाउनु पर्ने सूचना आएपछि काम रोकिएको ठाकुरको भनाइ छ । मोरङमा मात्र ३५ दशमलव ४ किमी सडक पर्छ । जसमध्ये ७ किमी जङ्गल क्षेत्र रहेको छ । जङ्गलका रुखमा नम्बर लगाउने बाहेक कुनै पनि काम अघि बढेको छैन । यस्तै सुनसरीमा ७ किमि, झापामा ३ कीमी र इलाममा ६ किमी जङ्गल क्षेत्र पर्दछ ।
