लेटाङ । लेटाङ ३ स्थित कमलपुर सामुदायिक वन उपभोक्ता समूहले आर्थिक रुपमा विपन्न उपभोक्ताहरुको स्वास्थ्य विमा कार्यक्रमलाई यसवर्ष पनि निरन्तरता दिएको छ । आइतबार कमलपुरस्थित सामुदायिक वन उपभोक्ता समूहको सभहलमा विशेष कार्यक्रम गरि समुदायिक वन समूहले ४५ जना उपभोक्ताको विमा गराइ दिएको छ । सामुदायिक वनले विमा अभिकर्तालाई नै कार्यक्रममा बोलाएर ४५ जना मध्ये १७ जनाको नयाँ विमा तथा १८ जनाको विमा नविकरण गराएको हो ।
वन उपभोक्ता समूहका अध्यक्ष गोपाल श्रेष्ठको अध्यक्षता तथा लेटाङ ३ का वडाध्यक्ष डम्बरबहादुर राईको प्रमुख आतिथ्यता रहेको कार्यक्रममा विमा कार्यक्रममा सहभागी भएका सबै उपोक्ताहरुलाई विमा कार्ड हस्तान्तरण गरिएको छ ।
कार्यक्रममा सामुदायिक वन उपभोक्ता महासंघका केन्द्रीय उपमहासचिव सीता श्रेष्ठ, सामुदायिक वन उपभोक्ता जिल्ला महासंघका कोषाध्यक्ष इन्दु चौधरी, सामुदायिव वन उपभोक्ता महासंघ लेटाङका अध्यक्ष आनन्दसागर तिम्सिना, लेटाङ ३ की वडासदस्य शरणकुमारी विक, शव डिभिजन वन कार्यालय लेटाङका सहायक वन अधिकृत स्वस्तिकनन्द सुवेदी,लगायतले विमा गराएका उपभोक्ताहरुलाई विमा कार्ड हस्तान्तरण गर्नुभयो ।
कार्यक्रममा बोल्दै वडाध्यक्ष डम्बर बहादुर राईले सामुदायिक वन उपभोक्ता समूहले निस्पक्षरुपमा विभिन्न परिवारका उपभोक्ता छनौट गरि विमा कार्यक्रममा समावेश गराएको जानकरी दिनुभयो । वडाध्यक्ष राईले वडाले समेत विभिन्न टोलबाट विपन्न परिवार छनौट गरि विमा गराउँदै आएको भन्दै त्यसको सदुपयोग गर्नुपर्नेमा जोड दिनुभयो । कार्यक्रममा बोल्दै अन्य वक्ताहरुले कलमपुर सामुदायिक वनले सामाजिक क्षेत्रका धेरै कार्यक्रम सञ्चालन गरेर उपभोक्ताहरुलाई सहयोग पुर्याउँदै आएको भनि प्रशंशा गर्नुभयो ।
यस्तै सामुदायिक वन उपभोक्ता समूहका अध्यक्ष गोपाल श्रेष्ठले सामुदायिक वन उपभोक्ता समूहले विभिन्न सामाजिक काम गर्ने क्रममा विपन्न परिवारको विमा कार्यक्रम सञ्चालनलाई निरन्तरता दिंदै आएको जानकारी दिनुभयो । उहाँले सँधैभरि वन समूहको भर पर्ने भन्दा पनि उपभोक्ता स्वयम सचेत भएर विमा गर्नुपर्नेमा जोड दिनुभयो । अध्यक्ष श्रेष्ठले विमा गराएपछि विरामी हुँदा मात्र नभएर वर्षमा एक–दुई पटक नियमित रुपमा स्वास्थ्य जाँच गर्न आग्रह गर्दै स्थानीय सरकारी स्वास्थ्य सँस्थाबाट सेवा लिनुपर्नेमा जोड दिनुभयो ।
नेपाल सरकारबाट नमुना सामुदायिक वनको रुपमा पुरस्कृत समेत भइसकेको कमलपुर सामुदायिक वन उपभोक्ता समूहले सामाजिक क्षेत्रमा काम गर्ने क्रममा कृषि सामाग्री वितरण, झुल वितरण, घर निर्माण र बालकक्षा सञ्चालन जस्ता काम गर्दै आएको छ ।
