सुन्दरहरैंचा । मोरङको सुन्दरहरैंचा नगरपालिकाका वडा सचिवमाथि दुव्र्यवहार गर्नेलाई कारवाही नभएको भन्दा वडासचिवहरु आन्दोलित भएका छन् । सुन्दरहरैंचा नगरपालिका वडा नम्बर ९ का वडासचिव डिकबहादुर भण्डारीमाथि सेवाग्राही भएर आएका व्यक्तिले हातपात गरेको घटनाका दोषिलाई हालसम्म कुनै कारवाही नभएको भन्दै वडासचिवहरु आन्दोलित भएका हुन् । सुन्दरहरैंचाका वडासचिवहरु लगायतका कर्मचारीहरुले आज हस्ताक्षरसहित संयुक्त विज्ञप्ती जारी गर्दै दोषिलाई कारवाही नगरेपछि वडाका कर्मचारीले असुरक्षित महसुस गरेकाले काम गर्ने सहज वातावरण तयार नभएसम्म र पीडित कर्मचारीले न्याय नपाएसम्म चरणवद्ध आन्दोलन घोषणा गरेको जनाएका छन् ।
आजदेखि सुरु भएको आन्दोलन अन्तरगत वडासचिवहरुले आज वडा कार्यालयमा वडासचिवबाट प्रवाह हुने सेवा ठप्प पारेका छन् भने निकाश ननिस्किए भोलि पनि सेवा ठप्प पार्ने विज्ञप्तीमा उल्लेख गरिएको छ । यस्तै असार १ गते वडा कार्यालयमा कार्यरत सम्पूर्ण कर्मचारीहरु नगरपालिकामा फिर्ता हुने तथा असार २ गतेदेखि नगरपालिका र नगरपालिका अन्तरगतका वडा कार्यालय र स्वास्थ्य संस्थाका अत्यावश्यक बाहेकका सम्पूर्ण सेवा ठप्प पार्ने आन्दोलनका कार्यक्रम सार्वजनिक गरिएको छ ।
सुन्दरहरैंचा नगरपालिका वडा नम्बर ९ का वडासचिव डिकबहादुर भण्डारीमाथि आइतबार सेवाग्राही भएर आएका सुन्दरहरैंचा ९ बस्ने भिषण थापाले वडाध्यक्षको कार्यकक्षमै वडाध्यक्षकै सामुन्ने हातपात गरि दुव्र्यवहार गरेका थिए । सोही घटनामा संलग्नलाई कारवाहीको माग गरेका कर्मचारीको माग पुरा नभएपछि उनीहरु आन्दोलित भएका हुन् । अविवाहित प्रमाणित गर्न आएका स्थानीय भिषण थापालाई वडाध्यक्षले यो काम वडा सविचले गर्ने हो भनेर भनिदिएपछि उनीहरुले वडासचिवमाथि दूव्र्यवहार गरेको पाइएको छ । पछि अविवाहित प्रमाणित गर्ने काम वडासचिवको नभइ वडाध्यक्षकै भएको बुझेपछि सचिवमाथि दूव्र्यवहार गर्ने थापाले वडासचिवसँग माफि समेत मागेका थिए ।
