लेटाङ । लेटाङ नगरपालिकाको आयोजनामा जेठ ९ गते देखि १२ गतेसम्म प्रथम मेयर कप क्रिकेट प्रतियोगिता २०८१ सञ्चालन हुने भएको छ । लेटाङ ५ स्थित प्रस्तावित बुद्ध रंगशालामा सञ्चालन हुने प्रतियोगितामा लेटाङकै ४ वटा टिमले प्रतिस्पर्धा गर्दैछन् ।
लेटाङमा रहेका क्रिकेट खेलाडीहरु र क्रिकेटसँग चासो राख्ने युवाहरुमध्येबाट खेलाडी छनौट गरि ६५ जना खेलाडीहरुलाई ४ वटा समूहमा विभाजन गरि प्रतिस्पर्धा गराउन लागिएको हो । लेटाङका पर्यटकीय क्षेत्रहरुको नामसँग जोडेर टीमहरुको नामाकरण गरि लिग पद्धतिमा प्रतियोगिता सञ्चालन गर्न लागिएको बताइएको छ ।
जसमा राजारानी किंग्स्, चिसाङ वारियर्स, वाराजी ह्याप्पी र कोलुङ नाईट राईडर्स गरि ४ टीम सहभागी हुनेछन् । जेठ ९ गते दिउँसो १ बजे हुने उद्घाटन खेलमा राजारानी किंग्स् र कोलुङ नाइट राइडर्स भिड्दैछन् । फाइनल खेल जेठ १२ गते दिउँसो १ बजे हुनेछ ।
प्रतियोगिताको विजेत टीमले ट्रफिसहित ६८ हजार नगद र उपविजेता टीमले ट्रफिसहित ३५ हजार नगद हात पार्नेछन् । देशको नाम अन्तर्राष्ट्रिय स्तरमा चिनाउन सफल क्रिकेट खेलमा बढी संभावना देखिएकाले लेटाङका युवाहरुलाई पनि क्रिकेट खेलतर्फ आकर्षित गराउने उद्देश्यले प्रतियोगिता सञ्चालन गर्न लागिएको नगर प्रमुख भूपेन्द्र कुमार लावतीले जानकारी दिनुभयो ।
लेटाङमा नगरपालिकाको आयोजनामा पहिलो पटक क्रिकेट प्रतियोगिता सञ्चालन हुन लागेपछि क्रिकेट खेलाडीहरु र क्रिकेट प्रेमीहरु उत्साहित भएका छन् ।
