जाँते । लेटाङ ९ जाँतेमा धुमधामका साथ श्रीमद्भागवत महापुराण तथा धन–धान्याचल सुरभी महायज्ञ सम्पन्न भएको छ । गौसंरक्षण र सम्वर्धनका लागि लेटाङ ९ जाँते गणेश मन्दिर परिसरमा सञ्चालित श्रीकृष्ण गौशाला जाँतेको आयोजनामा गत सोमबारदेखि सुर भएको महायज्ञ आइतबार सम्पन्न भएको हो ।
नयाँ वृन्दवन गौशाला सुन्दरहरैँचाका पीठाधिश दिनवन्धू शास्त्री महाराज र श्रीगोलोक गोवर्धन गौशाला शिवसताक्षीधाम झापाका पिठाधिश नन्दकिशोर भारद्वाज महाराजले गत सोमाबार उद्घाटन गर्नु भएको महायज्ञमा श्रीगोलोक गोवर्धन गौशाला शिवसताक्षीधाम झापाका आचार्य पण्डित घनश्याम खनालले कथावचन गर्नुभयो भने श्री वैजनाथ अधिकारी प्रारम्भिक सँस्कृत विद्यापिठ लेटाङ जाँतेका गुरु पण्डित सुदिप ढुंगानाले पाठपरायण गर्नु भएको थियो ।
भागवत कथाका साथै गाईको महिमा बारे मानिसहरुलाई जानकारी दिएर गाई संरक्षण गर्नुपर्छ भन्ने सन्देश दिंदै गौशालाको विकास र प्रवर्धनका लागि महायज्ञ सञ्चालन गरिएको हो ।
मोरङ जिल्लामै पहिलोपटक आयोजना गरिएको सुरभी महायज्ञमा ठूलो संख्यामा भक्तजनहरुले सहभागिता जनाएको र सफलतापूर्वक सम्पन्न भएको आयोजक समितिका अध्यक्ष सुजित बुढाथोकीले बताउनुभयो । महायज्ञमा नगद र जिन्सी गरेर अनुमानित २० लाख भन्दा बढीको दान प्राप्त भएको कोषाध्यक्ष मनोरथ घिमिरेले जानकारी दिनुभयो । महायज्ञको आम्दामी र खर्च बारे १ साता भित्र सार्वजनिक सुनुवाई गरि जानकारी गराइने भने उहाँले बताउनुभयो ।
महायज्ञमा दैनिक कथाप्रवचन, महात्म्य भजनकिर्तन लगायतका धर्मिक कार्यक्रम सञ्चालन गरिएको थियो । साथै प्रतियोगितात्मक भजनकिर्तन सञ्चालन गरि उत्कृष्ट हुनेहरुलाई ढोलक पुरस्कार दिइएको थियो । महायज्ञको समापन समारोहमा महायज्ञमा विभिन्न भूमिकामा सहयोग गर्ने व्यक्तित्वहरुलाई सम्मान समेत गरिएको थियो । यस क्षेत्रलाई झापाको सताक्षीधाम झैँ धर्मिक पर्यटकीय क्षेत्रको रुपमा विकास गर्ने बताइएको छ ।
