मोरङ । इलामको माई नगरपालिका–२ गोरखेमा सुन्दरहरैंचाबाट पिकनिक खान गएको सवारी दुर्घटना हुँदा तीन जना घाइते भएका छन् । जिल्ला प्रहरी कार्यालय इलामले दिएको जानकारी अनुसार मोरङ्गको सुन्दरहरैंचाबाट आज विहान पिकनिक खान गएको को १ ज ३७०६ नम्बरको सवारी सडकबाट १५ मिटर तल खस्दा दुर्घटना भएको हो ।
हुस्सु लागेर बाटो अल्मलिएपछि गाडी चालकले गाडी रोकेर स्थानीयलाई चेप्टी जाने बाटो सोध्न बाहिर निस्किएको समयमा गाडी गुडेर सडक भन्दा १५ मिटर तल खसेको बताइएको छ । गाडी दुर्घटनामा परि सुन्दरहरैंचा–१२ खोर्साने बस्ने ५६ वर्षीया विष्णुकुमारी खड्का, ५० वर्षीया कोपिला कार्की र ५७ वर्षीया माया तामाङ सामान्य घाईते भएको प्रहरीले जनाएको छ । घाईतेको माई अस्पतालमा उपचार भईरहेको छ ।
तिहारमा देउसी भैलो खेलेर जम्मा गरेको रकमबाट रमाईलो गर्न हेप्पी ड्रिम्स चेप्टी गएका १४ जना ज्येष्ठ महिलाहरु दुर्घटनामा परेको प्रहरीले जनाएको छ ।
