इन्द्रपुर जेसीज वर्ष २०२४ का अध्यक्ष उत्सव थापाले वर्ष २०२५ का अध्यक्ष आकाश दुलाललाई चेन सहित जेसिजको पदभार हस्तान्तरण गरेका थिए ।
इन्द्रपुर जेसीजको पदस्थापन सम्पन्न, समाजमा विशेष योगदान पुर्याउने व्यक्तिहरु सम्मानित

विराटचोक । मोरङको सुन्दरहरैँचास्थित इन्द्रपुर जेसीजको २३ औं तथा इन्द्रपुर जुनियर जेसीजको ७ औं पदस्थापन समारोह सम्पन्न भएको छ । कार्यक्रम विराटचोकमा रहेको नेपालीरिका होटलमा बुधबार भएको थियो ।

पदस्थापन कार्यक्रममा इन्द्रपुर जेसीज वर्ष २०२४ का अध्यक्ष उत्सव थापाले वर्ष २०२५ का अध्यक्ष आकाश दुलाललाई चेन सहित जेसिजको पदभार हस्तान्तरण गरेका थिए । त्यसैगरी जुनियर जेसीज वर्ष २०२४ का अध्यक्ष मदन भण्डारीले वर्ष २०२५ का अध्यक्ष आयुश अधिकारीलाई पदभार हस्तान्तरण गरे ।

पदस्थापन कार्यक्रममा इन्द्रपुर जेसिज वर्ष २०२५ का अध्यक्ष आकाश दुलालले आफनो कार्यकालमा नेतृत्व तथा व्यक्तित्व विकासमा मद्दत पुग्ने गतिविधिहरूलाई प्राथमिकतामा राखेर जेसिजको आस्था र विश्वास अनुसार काम गर्ने उल्लेख गर्नुभयो । कार्यक्रममा विभिन्न व्यक्तिले स्थापना गरेको पुरस्कारबाट समाजमा विशेष योगदान पुर्याउने व्यक्तिलाई सम्मानित गरिएको थियो । जसमा महिला सशक्तीकरण संयोजकतर्फ नरदेवी अवार्ड जेसी बबिता दाहाललाई प्रदान गरिएको छ । यो अवार्ड पूर्व अध्यक्ष नारायण कार्कीले स्थापना गर्नुभएको हो । यस्तै पूर्व अध्यक्ष शिवप्रसाद, शारदाप्रसाद र यज्ञप्रसाद ढकालले स्थापना गरेको कृष्ण विन्दा आउटस्टेन्डिङ अवार्ड जनसम्पर्क अधिकारी दिवस रिजाललाई प्रदान गरिएको छ ।