मोरङ । लेटाङमा जारी दोस्रो मेयर कप फुटबल प्रतियोगिताको उपाधिका लागि वडा नम्बर ३ र ४ भिड्ने भएका छन् । बुधबार भएको दोश्रो सेमीफाइनल खेलमा वडा नम्बर २ लाई पराजित गर्दै वडा नम्बर ४ ले वडा नम्बर ३ सँगको उपाधि भिडन्त पक्का गरेको हो । बुधबार कमलपुर खेल मैदानमा भएको निकै प्रतिस्पर्धात्मक खेलमा वडा नं २ माथि ४-३ को संघर्षपूर्ण जित हात पार्दै वडा नं ४ फाइनलमा प्रवेश गरेको हो ।
वडा नं ४ को जितमा सौलेन लामाले २ गोल गरे भने भुवन राई र पवन श्रेष्ठले १\१ गोल गरे । वडा नं २ का लागि विकल देवानले २ र अनुप मगरले १ गोल फर्काए पनि हार टार्न सकेनन् । विजेता टिम वडा नं ४ का सौलेन लामा प्लेयर अफ दी म्याच घोषित भए । वडा नम्बर ३ ले मंगलबार भएको पहिलो सेमीफाइनल खेलमा वडा नम्बर ६ लाई पराजित गर्दै फाइनलमा स्थान बनाइ सकेको थियो ।
असार १३ गतेबाट शुरू प्रतियोगिताको फाइनल खेल असार २२ गते शुक्रबार हुनेछ । लेटाङ नगरपालिकाको आयोजनामा लेटाङ ३ कमलपुरस्थित जुद्ध बहादुर स्मृति खेलमैदानमा सञ्चालित प्रतियोगिताको उपाधि विजेता टीमले नगद १ लाख ३५ हजार र उपविजेता टीमले ६५ हजार पुरस्कारसहित ट्रफि पाउने छन् ।
