लेटाङ । लेटाङ ८ जाँते बजारस्थित नोवेल एजुकेशन डेभलपमेन्ट फाउण्डेशनमा कक्षा ११ को पठन पाठन सुरु हुने भएको छ । नगरकै अग्रणी नीजि विद्यालयको रुपमा पहिचान बनाउन सफल नोवेल एजुेकशनमा कक्षा १० सम्म मात्र पठन पाठन हुने गरेकोमा यसै शैक्षिक सत्रदेखि कक्षा ११ को पठनपाठन सुरु गर्न लागिएको हो ।
नगरपालिकाबाट कक्षा ११ को अनुमति प्राप्त भइसकेकाले आगामी श्रावणको पहिलो हप्तादेखि कक्षा ११ मा व्यवस्थापन विषयतर्फको अध्यापन सुरु गरिने प्रिन्सिपल भोलानाथ पाण्डेले जानकारी दिनुभयो । व्यवस्थापनतर्फ ऐच्छिक विषय कम्प्युटर साइन्स सहितको कक्षा सञ्चालन गर्न लागिएको समेत उहाँले जानकारी दिनुभयो । कक्षा ११ मा आधुनिक विषय र गुणस्तरीय शिक्षाका लागि विद्यार्थीहरुले नगर भन्दा बाहिरका विद्यालयमा जानु परिरहेको बाध्यतालाई मध्यनजर गर्दै जाँतेमै कक्षा ११ को पठनपाठन सुरु गरिएको उहाँको भनाइ छ । नोवेल एजुकेशनले कक्षा ११ समेत सुरु गरेपछि गुणस्तरिय शिक्षाको खोजी गर्दै घर भन्दा टाढा जानुपर्ने यस क्षेत्रका विद्यार्थीहरुको बाध्यता अन्त्य हुने भएको छ ।
व्यवस्थापनतर्फ आधुनिक विषयको रुपमा रहेको कम्प्युटर साइन्स समेत लेटाङ जाँतेकै विद्यालयमा अध्यापन हुने भएपछि विद्यार्थीहरु समेत हर्षित भएका छन् ।
नयाँ कक्षा सुरु गरिएको भएपनि दक्ष र अनुभवि शिक्षकहरुद्वारा पठन पाठन सञ्चालन गरिने भएकाले शैक्षिक गुणस्तरको गरिमालाई खस्किन नदिने तर्फ आफुहरु सचेत रहेको प्रिन्सिपल पाण्डेको भनाइ छ । कक्षा १० सम्मको गुणस्तरीय शिक्षाका लागि अभिभावकहरुले जुन विश्वास गरिरहनु भएको छ, कक्षा ११ मा समेत त्यसलाई कायम गर्ने तरिकाले अघि बढ्ने प्रिन्सिपल पाण्डेले प्रतिवद्धता समेत जनाउनु भएको छ ।
लेटाङ नगरपालिकामा यस वर्ष नोवेल एजुकेशनसहित अन्य २ वटा गरि जम्मा ३ वटा विद्यालयले कक्षा ११ को पठन पाठनका लागि अनुमति पाएका छन् ।
