- राजु गौतम
लेटाङ, २० माघ । लेटाङमा तेस्रो चिसाङ नकआउट फुटबल प्रतियोगिता २०८० हुने भएको छ । आयोजक क्लब चिसाङ युवा क्लबले शनिबार पत्रकार सम्मेलन गर्दै माघ २४ गतेदेखि फागुन ३ गतेसम्म लेटाङस्थित प्याब्सुल खेल मैदानमा प्रतियोगिता हुने जानकारी दिएको हो ।
झापा, मोरङ र सुनसरीका ८ वटा टीमहरु सहभागी हुने प्रतियोगिताको उद्घाटन खेलमा माघ २४ गते पथरी ११ र लेटाङ फुटबल क्लव प्रतिस्पर्धा गर्दैछन् । प्रतियोगिताको उपाधि विजेताले ट्रफी सहित १ लाख २० हजार तथा उपविजेताले ट्रफी सहित ६५ हजार प्राप्त गर्ने आयोजकले जनाएको छ ।
यस्तै प्रतियोगिताका हरेक खेलको म्यान अफ द म्याच तथा विधागत उत्कृष्ट खेलाडीहरूलाई समेत नगद तथा ट्रफीको व्यवस्था गरिएको पत्रकार सम्मेलनमा जानकारी गराइएको छ ।
लागूऔषध दुव्र्यसन तथा बालहिंसा मुक्त समाज निर्माण गरौं भन्ने नाराका साथ आयोजना गरिएको प्रतियोगितालाई नेपाल सरकार खेलकुद मन्त्रालय तथा राष्ट्रिय खेलकुद परिषद्को आर्थिक सहयोग रहने आयोजकले जनाएको छ । साथै लेटाङ नगरपालिका, विभिन्न सहयोगी दाता तथा खेलप्रेमीहरूको सहयोगमा १२ लाख १५ हजार ६ सय ६० रुपैयाँको लागतमा प्रतियोगिता सम्पन्न हुने आयोजकले जनाएको छ । 
प्रतियोगितालाई सपोर्ट पुनस्थापना केन्द्र पथरी र उज्यालो जीवन प्रतिष्ठान जाँतेले सहप्रायोजन गरेका छन् । प्रतियोगिताका खेलहरू मिडिया पार्टन लेटाङ खबरले प्रत्यक्ष प्रशारण गर्न जनाइएको छ ।
प्रतियोगितामा पथरी ११, लेटाङ फुटबल क्लव, इन्द्रेणी युवा क्लव वराहक्षेत्र सुनसरी, एपीएफ, दमक चात्या सा फुटबल क्लव, आयोजक चिसाङ युवा क्लव, विर्तामोड फुटबल क्लव झापा र बेलबारी फुटबल क्लव गरि ८ टीम सहभागी हुनेछन् ।
