सुन्दरहरैँचा । मोरङको सुन्दरहरैँचा नगरपालिकाले नागरिकताको अनलाइन सिफारिस सेवा सुरु गरेको छ । जिल्ला प्रशासन कार्यालय मोरङको सहजीकरणमा सोमबार आयोजित विशेष कार्यक्रममार्फत सेवा सुरु गरिएको हो ।
नगरपालिकामा आयोजित कार्यक्रममा नगर उपप्रमुख अकली चौधरी, प्रमुख प्रशासकीय अधिकृत विनोद कुमार न्यौपाने, वडा नम्बर १२ का वडाध्यक्ष एवं नगर प्रवक्ता रोशनप्रसाद ढकाल र ८ न. वडाका वडाध्यक्ष खेमप्रसाद न्यौपानेले संयुक्तरूपमा अनलाइन सिफारिस सेवा सुरु गर्नुभयो । कार्यक्रममा कोशी प्रदेश सभाका पूर्वसदस्य लोकप्रसाद संग्रौलाको पनि उपस्थिति रहेको थियो ।
नगर उपप्रमुख चौधरीले अनलाइन प्रणालीले सेवाग्राहीलाई छिटोछरितो रूपमा नागरिकता प्राप्त गर्न सहयोग पुर्याउने र प्रशासनिक झञ्झट हटाउने विश्वास व्यक्त गर्नुभयो । अब सफ्टवेयर प्रणालीमा प्रविष्ट विवरणहरू गृह मन्त्रालय अन्तर्गतको नागरिकता फाँटमा रजिष्टेशन कोडका आधारमा पठाइने भएकाले सेवाग्राहीले सिफारिसका पत्रहरू जिल्ला वा इलाका प्रशासन कार्यालयमा लैजानुपर्ने बाध्यता हट्नेछ ।
यस सेवामार्फत अब नागरिकता सिफारिसका लागि कार्यालयमा आउने झन्झट बेहोर्नु नपर्ने भएको छ । अनलाइन प्रणाली प्रयोग गरेर सिफारिस प्रक्रिया पूरा गर्न सकिने भएकाले यो सेवाले सेवाग्राहीको समय, पैसा र श्रम बचत हुनेछ ।
सेवाको सुरुवातसँगै सुन्दरहरैँचा नगरपालिकाले प्रविधिको उपयोगमार्फत जनतालाई छरितो र प्रभावकारी सेवा उपलब्ध गराउनेतर्फ एक महत्वपूर्ण कदम चालेको छ ।
