लेटाङ । नीजि तथा आवासिय विद्यालयहरुको संगठन प्याव्सनको लेटाङ नगर कार्य समितिले छैटौं वार्षिक साधारणसभा विभिन्न कार्यक्रम गरि सम्पन्न गरेको छ । आज मंगलबार सहिद दिवसको सन्दर्भ पारेर लेटाङ ३ स्थित हमरहट मेमेरियल इंग्लिस स्कूलमा प्याव्सन लेटाङले आफ्नौ छैटौं साधारणसभा सम्पन्न गरेको हो ।
कार्यक्रमका प्रमुख अतिथि लेटाङ नगरपालिका शिक्षा शाखा प्रमुख कृष्णराज राईले प्रजातान्त्रिक आन्दोलनमा बलिदानी दिएका ४ सहिदहरुको तस्विरमा माल्यार्पण गर्दै कार्यक्रम उद्घाटन गर्नुभयो ।
साधारणसभाको अवसरमा प्याव्सन लेटाङले नगर क्षेत्रमा रहेका नीजि विद्यालयका १४ जना शिक्षकहरुलाई सम्मान गरेको छ । १४ वटा विद्यालयले १ जना उत्कृष्ट शिक्षक छनौट गरि पठाएकोमा प्याव्सनले उनीहरुलाई दोसल्ला ओढाएर सम्मानपत्र प्रदान गरि सम्मान गरेको हो । कार्यक्रमका प्रमुख अतिथि लेटाङ नगरपालिका शिक्षा शाखा प्रमुख कृष्णराज राईले शिक्षकहरुलाई सम्मान गर्नुभयो । वर्षौंदेखि नीजि विद्यालयमा काम गरेर नगरको शिक्षा क्षेत्रको विकासमा योगदान गरिरहेका शिक्षकहरुलाई सम्मान गरिएको हो ।
यसैगरि साधारणसभाकै अवसरमा लेटाङ प्याव्सनले प्याव्सनमा आवद्ध नगरका १४ वटा नीजि विद्यालयबाट १ छात्र र १ जना छात्रा गरि २ २ जनाका दरले २८ जना विद्यार्थीहरुलाई कपि कलम प्रदान गरेको छ । कार्यक्रमका विशिष्ट अतिथि लेटाङ अस्प्तालका डाक्टर धर्मेन्द्र कुमार यादवले विद्यार्थीहरुलाई कपि कलम प्रदान गर्नुभयो । हरेक विद्यालयबाट आर्थिक रुपमा कमजोर विद्यार्थी छनौट गरि सहयोग गरिएको प्याव्सन लेटाङका अध्यक्ष कमल अधिकारीले जानकारी दिनुभयो ।
यसैगरि प्याव्सन लेटाङले २०७९ सालको एसइइ परीक्षामा नीजि विद्यालयहरुबाट उत्कृष्ट हुने एकजना छात्र र एकजना छात्रा गरि २ जनालाई नगदसहित सम्मान गरेको छ । २०७९ को एसइइमा उत्कृष्ट हुने लेटाङ ८ स्थित नोवेल एजुकेशन फाउण्डेशनका छात्र अग्रज सुवेदी र छात्रा पनिता रानालाई नगद २ २ हजार र प्रमाणपत्रसहित सम्मान गरिएको हो ।
साधारणसभालाई सम्बोधन गर्दै कार्यक्रमका प्रमुख अतिथि लेटाङ नगरपालिका शिक्षा शाखा प्रमुख कृष्णराज राईले नीजि विद्यालयहरुले नगरको शिक्षा क्षेत्रको विकासमा ठूलो योगदान पुर्याएको भन्दै नगरपालिका सहकार्य र सहयोग गर्न तयार गरेको बताउनुभयो । उहाँले विद्यालयहरुले पनि राज्यको नीति नियम पालना गर्ने कुरामा विशेष ध्यान दिनुपर्ने बताउनुभयो ।
लेटाङ व्याव्सका सचिव सुरेन्द्रजंग राईले सञ्चालन गर्नु भएको कार्यक्रममा प्याव्सन लेटाङका सचिव भोला पाण्डेले स्वागत मतव्य राख्नु भयो । साधारणसभामा संस्थाका अध्यक्ष कमल अधिकारीले प्याव्सन लेटाङले वर्ष भरि गरेका गतिविधि तथा आगामी कार्ययोजना समेटिएको प्रतिवेदन प्रस्तुत गर्नुभयो । सहिद दिवसलाई उपेक्षा गरेको अनुभुति भएकाले सोहि सन्दर्भ पारेर साधारणसभा गरिएको अध्यक्ष कमल अधिकारीले जानकारी दिनुभयो ।
कार्यक्रममा प्याव्सनमा आवद्ध लेटाङका विभिन्न विद्यालयका सञ्चालक, प्रधानाध्यापक, पत्रकार लगायतको समेत उपस्थिति रहेको थियो ।
