– राजु गौतम
लेटाङ । भर्खरै आधिकारिक रुपमा दर्ता भएको लेटाङ साहित्य कला सङ्गमले सोमबारदेखि ’सृजना चौतारी’ शृङ्खला शुरु गरेको छ । लेटाङ क्षेत्रमा साहित्य तथा कलाका गतिविधिलाई चलायमान बनाउने उद्देश्यका साथ लेटाङ साहित्यक कला सङ्गमले साहित्यिक तथा कलात्मक अभिनय प्रस्तुतिको मासिक कार्यक्रम अन्तरगत ’सृजना चौतारी’ शृङ्खला शुरु गरेको हो ।
पहिलो शृङ्खला अन्तरगत संस्थाले सोमबार लेटाङ ५ स्थित श्री सूर्य प्राथमिक विद्यालयमा गरेको कार्यक्रममा २० जना विद्यार्थीहरूले आफ्नो कला प्रस्तुत गरेका थिए ।
संस्थाका अध्यक्ष गणेश दवाडीको अध्यक्षता तथा उपाध्यक्ष शान्ति पाख्रीन लामाको सञ्चालनमा सम्पन्न कार्यक्रममा संस्थाका अग्रज साहित्यिक व्यक्तित्वहरूले विद्यार्थीहरूको हौसला बढाएका थिए ।
विद्यालयका प्रधानाध्यापक राजु गौतमले बाल साहित्यको प्रतिभालाई अङ्कुरण गराउँदै कला प्रस्फुटन गराउन सहयोग पुग्ने गरी पहिलो कार्यक्रम नै आफ्नो विद्यालयमा आयोजना गरिदिएकोमा संस्थालाई धन्यवाद दिनुभयो ।
