सुन्दरहरैंचा । मोरङको सुन्दरहरैँचा नगरपालिकाले व्यवसाय दर्ता तथा नवीकरणका लागि घरदैलो अभियान शुरु गरेको छ । सोमबार नगरपालिकाको वडा नम्बर ४ स्थित बलियाबाट अभियान सुरु गरिएको हो । अभियानको सुभारम्भ गर्दै नगरप्रमुख केदारप्रसाद गुरागाईले नगरपालिकाभित्र सञ्चालनमा रहेका तर दर्ता नभएका व्यवसायलाई सहजताका लागि घरमै पुगेर सेवा दिने उद्देश्यले अभियान सञ्चालन गरेको बताउनुभयो ।
“कतिपय व्यवसायहरु दर्ता नगरी सञ्चालन भएका छन्, कतिपय दर्ता भएकाले पनि नियमित नवीकरण गरेका छैनन् ।” उहाँले भन्नुभयो, “व्यवसायलाई दर्ता गरी कानुनी ढंगबाट व्यवस्थित रुपमा सञ्चालन गराउने उद्देश्यले अभियान सञ्चालन गरिएको हो ।”
नगरपालिकाका राजश्व शाखा प्रमुख राजन रेग्मीले पहिलो दिन १५ वटा नयाँ व्यवसाय दर्ता र २ वटा नवीकरण गरिएको जानकारी दिँदै यो अभियानले व्यवसायी उत्साहित भएको बताउनुभयो । व्यवसायीको सहजताका लागि टोलीले घरदैलोमै पुगेर व्यवसायको सबै प्रक्रिया पुर्याएर त्यहिं दर्तागरी प्रमाणपत्र दिने व्यवस्था मिलाईएको समेत उहाँले बताउनु भयो ।
अभियानमा वडा नम्बर ४ का वडा अध्यक्ष कैलाश बस्नेत, सुन्दरदुलारी उद्योग वाणिज्य संघका अध्यक्ष जीवनप्रसाद ढुंगाना, कार्यपालिका सदस्य दुर्गा पोखरेल, वडा सदस्यहरु, कर्मचारीहरु लगायत सहभागी छन् ।
