सुन्दरहरैँचा । सुन्दरहरैँचा नगरपालिकाको १५ औँ नगरसभाले विभिन्न ५ वटा विधेयक पारित गरेको छ । मंगलबार नगरपालिकाको सभाहलमा विधेयक सभाको रुपमा बसेको हिउँदे सभाले नगरपालिकाको कार्यसम्पादनका लागि आवश्यक विभिन्न ५ वटा विधेयकहरु सर्वसहमतिले पारित गरेको हो ।
नगर प्रमुख केदारप्रसाद गुरागाईँको अध्यक्षतामा बसेको नगरसभा बैठकले विनियोजन ऐन २०८१ लाई पहिलो पटक संशोधन गर्न बनेको विधेयक २०८१; आर्थिक ऐन २०८१ लाई पहिलो पटक संशोधन गर्न बनेको विधेयक २०८१; न्यायिक समितिले उजुरीको कारबाही किनारा गर्दा अपनाउनुपर्ने कार्यविधिका सम्बन्धमा व्यवस्था गर्न बनेको विधेयक २०८१; न्यायिक समितिको फैसला तथा मिलापत्र कार्यान्वयन विधेयक २०८१ र सहकारी ऐन २०७५ लाई दोस्रोपटक संशोधन गर्न बनेको विधेयक २०८१ गरि ५ वटा विधेयक सर्वसहमतिमा पारित गरेको हो ।
नगरसभामा सरकारी विधेयक र अर्थ विधेयकको रूपमा रहेको विनियोजन ऐन २०८१ लाई पहिलो पटक संशोधन गर्न बनेको विधेयक २०८१ र आर्थिक ऐन २०८१ लाई पहिलो पटक संशोधन गर्न बनेको विधेयक २०८१ उप–प्रमुख अकली चौधरीले टेबल गर्नुभएको थियो भने बाँकी अन्य विधेयकहरू विधायन समितिका संयोजक खेमप्रसाद न्यौपानेले टेबल गर्नुभएको थियो ।
नगरसभाबाट पारित भएका यी सबै विधेयकहरू अब नगर प्रमुखले प्रमाणिकरण गरि सुन्दरहरैँचा नगरपालिकाको स्थानीय राजपत्रमा प्रकाशित भएपछि लागू हुने नगरपालिकाका प्रमुख प्रशासकीय अधिकृत विनोद कुमार न्यौपानेले जानकारी दिनुभयो ।
