लेटाङ । दशौँ राष्ट्रिय योग दिवसको अवसरमा पतञ्जली योग समिति लेटाङले विशेष कार्यक्रम गरेको छ । लेटाङ नगरपालिकाका नगर प्रमुख भूपेन्द्र कुमार लावतीको प्रमुख आतिथ्यतामा भएको कार्यक्रममा लेटाङमा रहेका पतञ्जली योग समितिमा आवद्ध योग साधकहरुले योगका विभिन्न आसनहरु प्रदर्शन गरेका थिए । सो अवसरमा धार्मिक विधि अनुशार हवन समेत गरिएको योग नगर समितिका महिला महामन्त्री उषा न्यौपाने दाहालले जानकारी दिनुभयो ।
कार्यक्रममा लेटाङ नगरपालिका नगर प्रमुख भूपेन्द्रकुमार लावती, उपप्रमुख कृष्णकुमारी निरौला, वडा नम्बर ३ का वडाध्यक्ष डम्बर राई, वडा नम्बर ४ का वडाध्यक्ष रामकुमार श्रेष्ठ लगायतको आतिथ्यता रहेको थियो ।
मन्त्रिपरिषद्को २०७२ साउन २८ गतेको बैठकले माघ १ गते राष्ट्रिय योग दिवस मनाउने औपचारिक निर्णय गर्दै यसको संयोजन गर्ने जिम्मेवारी शिक्षा मन्त्रालयलाई सुम्पेको थियो । तत्कालीन शान्ति तथा पुनःनिर्माणमन्त्री नरहरि आचार्यको प्रस्तावमा मन्त्रिपरिषद्ले माघ १ गतेलाई राष्ट्रिय योग दिवस घोषणा गरेको हो । नेपालमा यसअघि २०३६ सालदेखि सूर्य उत्तरायण शुरु हुने दिन पारेर डाक्टर हरिप्रसाद पोखरेलको सक्रियतामा योगको क्षेत्रमा काम गरेका संस्थाको सहभागितामा विश्व योग दिवस मनाउन थालिएको थियो ।
