लेटाङ, २० पौष । मोरङको लेटाङ नगरपालिका वडा नम्बर ४ निवासी टिकटकर चिम्फू मगर र उहाँको टीकटक समूह टीम बटरफ्लाईको पहलमा सहयोग संकलन गरि लेटाङको पहाडी क्षेत्रको ग्रामीण विद्यालयमा अध्ययनरत विद्यार्थीहरूलाई न्यानो कपडा वितरण गरिएको छ ।
टीकटकबाट सकारात्मक कार्यमा युवाहरूले सहयोग गर्न सक्छन् भन्ने सक्ने सन्देश सहित उनीहरुले शुक्रबार लेटाङ नगरपालिका वडा नम्बर ७ स्थित समलामा रहेको श्री ज्ञानज्योति प्राथमिक विद्यालयमा अध्ययनरत सम्पूर्ण ५२ जना विद्यार्थीहरूलाई न्यानो कपडा सँगै स्टेसनरी सामाग्री पनि वितरण गरेका छन् ।
गत तमु लोसारको अवसरमा टीम बटरफ्लाई ग्रुपको आयोजनामा भएको टीकटक कार्यक्रममा प्राप्त सहयोग रकमका अतिरिक्त टीकटक ग्रुप द साइनिङ स्टार, टीकटक ग्रुप अमित गुरुङ टीकटक फेमेली तथा जोसिम गुरुङ समेतको सहयोगबाट न्यानो कपडा तथा स्टेसनरी व्यवस्थापन गरिएको टीम बटरफ्लाईका होस्ट चिम्फू मगरले जानकारी दिनुभयो ।
विद्यालयकी प्रधानाध्यापक चन्द्राकुमारी राईले सामाजिक सञ्जालको सहि सदुपयोगबाट समाजमा उदाहरणीय कार्य स्वरुप आफ्नो विद्यालयलाई रोज्दै न्यानो कपडा तथा स्टेसनरी वितरण गरेकोमा टीम बटरफ्लाई ग्रुपलाई धन्यवाद दिनुभयो । उहाँले यसप्रकारका कार्यले सम्पूर्ण सामाजिक सञ्जाल प्रयोगकर्ताहरूलाई रचनात्मक सहयोग गर्न प्रेरणा मिल्ने समेत बताउनुभयो ।
सोही विद्यालयका शिक्षक राजु गौतमको समन्वयमा टीकटकर तथा टीकटक ग्रुपले सहयोग गरेको हो । यसअघि पनि शिक्षक गौतमको समन्वयमा विद्यालयमा विभिन्न व्यक्ति तथ समूहहरुले सहयोग गर्दै आएका छन् ।
