लेटाङ कमलपुर बेलडाँगी पैनी स्तरोन्नती हुँदै, करिव साढे ६ करोडको काम हुने

लेटाङ । लेटाङ ३ स्थित लेटाङ कमलपुर बेलडाँगी सिंचाइ पैनीको स्तरोन्नती  हुने भएको छ । प्रदेश सरकारमार्फत बजेट  व्यवस्थापन भएपछि ६ करोड ४७ लाखको लागतमा लेटाङ कमलपुर बेलडाँगी पैनीलाई पक्की ढलान गरि स्तरोन्नती गर्न लागिएको उपभोक्ता समितिका अध्यक्ष ओम प्रकाश श्रेष्ठले जानकारी दिनुभयो । सोही योजना सञ्चालनका विषयमा उपभोक्ताहरुलाई २ दिने तालिम समेत प्रदान गरिएको छ । जलश्रोत तथा सिंचाइ विकास डिभिजन कार्यालय विराटनगरले स्थानीय जनसेवा सामुदायीक वनको सभाहलमा आयोजना गरेको तालिममा सिंचाइ योजनाका ४५ जना उपभोक्ताहरुको सहभागिता रहेको थियो । 

लेटाङ कमलपुर बेलडाँगी सिंचाइ योजनाका लागि प्रदेश सरकारबाट चालु आर्थिक वर्षमा बजेट विनियोजन भएपछि गुणस्तरीय रुपमा काम सम्पन्न गर्नका लागि जलश्रोत तथा सिंचाइ विकास डिभिजन कार्यालय विराटनगरले उपभोक्ताहरुका लागि अभिमुखिकरण तालिम दिएको हो । तालिममा जलश्रोत तथा सिंचाइ विकास डिभिजन कार्यालय विराटनगरका प्रमुख मेघनाथ ज्ञवाली, इञ्जिनियर सुमन कुमार भट्टराई, गुलाब चौधरी, सव इञ्जिनियर निरज चौधरी र शाखा अधिकृत लक्ष्मी कुमारी माझीले योजना सञ्चालन गर्दा ख्याल गर्नुपर्ने कुराहरुको विषयमा जानकारी दिनुभयो । 

तालिममा विकास निर्माणका कार्य गर्दा उपभोक्ताहरुले गुणस्तरीय निर्माण कार्य गराउनका लागि ध्यान दिनुपर्ने विषय बारे पनि जानकारी गराइयो । तालिमको उद्घाटन कार्यक्रममा लेटाङ नगर प्रमुख भूपेन्द्र कुमार लावतीको समेत उपस्थिति रहेको थियो भने समापन कार्यक्रममा लेटाङ ३ का वडाध्यक्ष डम्बर बहादुर राई र लेटाङ ४ का वडाध्यक्ष राम कुमार श्रेष्ठको समेत सहभागिता रहेको थियो । उद्घाटन कार्यक्रम संस्थाका सचिव कुमार भण्डारीले सञ्चालन गर्नु भएकोमा समापन कार्यक्रम सिंचाइ डिभिजनका सीएओ चोलिन्द्र विकले सञ्चालन गर्नु भएको थियो । 

६ करोड ४७ लाख बजेटबाट मुहानदेखि कमलपुर पुछारसम्म गरेर साढे ४ किलोमिटर क्षेत्रमा १५ महिना भित्र पैनीलाई पक्की ढलान गरिने सिंचाइ योजनाका अध्यक्ष ओमप्रकाश श्रेष्ठले जानकारी दिनुभयो । सो योजना अन्तरगत पहिलो चरणमा ५० लाख बजेटबाट ३ सय ९१ मिटर पैनीलाई पक्की ढलान गर्ने कार्य धमाधम भइरहेको छ । यस सिंचाइ योजनाबाट ११ सय विगाहा क्षेत्रमा सिंचाई सुविधा पुग्ने बताइएको छ । यसैबीच जलश्रोत तथा सिंचाइ विकास डिभिजन कार्यालय विराटनगरका प्रमुख मेघनाथ ज्ञवाली नेतृत्वको टोलीले लेटाङ कमलपुर बेलडाँगी सिंचाइ योजनाको निर्माण कार्यको अवलोकन पनि गरेको छ ।