मोरङ । लेटाङमा जारी दोस्रो मेयर कप फुटबल प्रतियोगिता अन्तरगत शनिबारको खेलमा विजयी हुँदै वडा नम्बर ३ सेमीफाइनलमा प्रवेश गरेको छ । लेटाङ ३ कमलपुरस्थित घरेलु मैदानमा भएको क्वाटरफाइनल खेलमा वडा नम्बर ८ लाई ० का विरुद्ध २ गोलले पराजित गर्दै लेटाङ ३ ले सेमीफाइनलमा स्थान पक्का गरेको हो । वडा नं ३ को जितमा खेलको पहिलो हाफमा सागर विक र आशिष माझीले समान १\१ गोल गरे । वडा नम्बर ३ ले खेलको दोश्रो हाफमा वडा नम्बर ८ माथि निकै दवाव कायम गरेपनि गोल भने गर्न सकेन । वडा नम्बर ८ का गोलकिपरले आकर्षक प्रदर्शन गर्दै आधादर्जन बढी प्रहार रोकेका थिए । खेलको म्यान अफ दी म्याच भने वडा नं ३ का रोहित राई घोषित भए ।
प्रतियोगिता अन्तरगत चौथो क्वाटरफाइनलमा आइतबार वडा नं ५ र वडा नं ४ भिड्नेछन् । वडा नम्बर ५ ले वडा नम्बर १ लाई पराजित गर्दै क्वाटरफाइनलमा स्थान बनाएको हो भने वडा नम्बर ४ ले सिधै क्वाटरफाइनलमा खेल्ने अवसर पाएको हो ।
नगरका ९ वटै वडा सहभागि प्रतियोगिताको फाइनल खेल असार २२ गते हुनेछ । प्रतियोगिताबाट छनौट भएका खेलाडीहरुलाई समेटेर नगर स्तरीय फुटबल टीम तयार गर्ने योजना रहेको नगर खेलकुद विकास समितिका सदस्य सचिव कृष्णराज राईले जानकारी दिनुभयो । प्रतियोगितामा उपाधि विजेता टीमले नगद १ लाख ३५ हजार र उपविजेता टीमले ६५ हजार पुरस्कारसहित ट्रफि पाउने छन् ।
