लेटाङ । लेटाङ नगरपालिकाले आगामी आर्थिक वर्ष ०८२ । ०८३ को नीति तथा कार्यक्रम निर्माणका लागि नगरवासीसँग सुझाव माग गरेको छ । नगरपालिकाले विहीबार एक सूचना जारी गर्दै नगरको नीति तथा कार्यक्रम निर्माणका लागि २०८२ वैशाख ७ गते भित्र सुझाव पठाउन सूचति गरेको हो ।
लेटाङ नगरपालिकाले सिमित स्रोत साधनको उच्चतम उपयोगमार्फत संस्थागत विकास सुशासन प्रवर्धन र विकास निर्माणका कार्यहरु संचालन गर्न आवश्यक नीतिगत ब्यवस्थाका लागि सम्पुर्ण राजनीतिक दल, संघसंस्था, राष्ट्रसेवक, समाजसेवी तथा सवै नगरबासीहरुमा सुझावहरुको अपेक्षा गरेको सूचनामा उल्लेख गरिएको छ । आर्थिक वर्ष २०८२ । 0८३ मा लेटाङ नगरपालिकाको नगरसभाको अधिवेशनले पारित गर्ने नीति तथा कार्यक्रममा समावेश गर्न सकिने कार्यान्वयन योग्य तथा रचनात्मक सुझावहरु वैशाख ७ गते भित्र इमेल वा पत्रमार्फत पठाउन नगरपालिकाले अनुरोध गरेको छ ।
लेटाङ नगरपालिकाको कार्यालय, नगरसभाको सचिवालय, मोरङ मा सिधै पत्र पठाउन वा letangmunicipality@gmail.com मा इमेलबाट सुझाव पठाउन सकिने नगरपालिकाले जनाएको छ ।
सुझाव पठाउँदा निम्न विषयहरुलाई समेटेर पठाउन सकिने पनि सूचनमा उल्लेख गरिएको छ ।
१. आर्थिक विकास सम्वन्धी नीति ( कृषि, पशुपंक्षी, उद्यम, सहकारी, श्रम, रोजगार, पर्यटन, राजश्व लगायत )
२. सामाजिक विकास सम्वन्धी नीति ( शिक्षा, स्वास्थ्य, महिला बालबालिका, जेष्ठनागरिक, अपाङ्गता, विभिन्न लक्षित समुह, खेलकुद, न्यायिक मेलमिलाप, पञ्जिकरण, संघ संस्था सवलिकरण लगायत )
३. पूर्वाधार विकास सम्वन्धी नीति ( सडक, पुल, खानेपानी, सिचाई, भवन लगायत )
४. सुशासन तथा अन्तर सम्वन्धी नीति ( वन वातावरण तथा विपद ब्यवस्थापन, संस्थागत सुधार, क्षमता विकास, सार्वजनिक जग्गा संरक्षण, प्रविधिमैत्री सार्वजनिक सेवा, नागरिक सन्तुष्टी अभिबृद्धि लगायत )
नगरपालिकाले चैत्र ५ गतेदेखि आगामि आर्थिक वर्षको नीति निर्माण थालेकोमा वैशाख १० गते निर्माण सम्पन्न गरि कार्यपालिकामा पेश गर्ने कार्यतालिका रहेको नगरपालिकाका योजना शाखा प्रमुख चेतनाथ गौतमले जानकारी दिनुभयो ।
हेर्नुहोस् सूचना :
