लेटाङ । लेटाङ ३ स्थित कमलपुर सामुदायीक वन उपभोक्ता समूहले आर्थिकरुपमा कमजोर परिवारका उपभोक्ताहरुलाई लक्षित गरि स्वास्थ्य विमा कार्यक्रम सञ्चालन गरेको छ । समूहले सामाजिक उत्तरदायीत्व निर्वाह गर्दै विपन्न वर्ग लक्षित कार्यक्रम अन्तरगत अघिल्ला वर्षदेखि नै सञ्चालन गरिरहेको स्वास्थ्य विमा कार्यक्रमलाई यसवर्ष समेत निरन्तरता दिएको हो ।
कमलपुर सामुदायीक वन उपभोक्ता समूहले आज मंगलबार संस्थाका अध्यक्ष गोपाल श्रेष्ठको अध्यक्षतामा विशेष कार्यक्रम गरि उपभोक्ताहरुमध्ये आर्थिकरुपमा कमजोर रहेका परिवारलाई छनौट गरि स्वास्थ्य विमा गरिदिएको हो । साथै अघिल्ला वर्षमा स्वास्थ्य विमा गरेका विपन्न परिवारका उपभोक्ताहरुको स्वास्थ्य विमा नविकरण समेत समूहले नै गरिदिएको छ ।
वडामा खटिएका स्वास्थ्य विमा अभिकर्तालाई बोलाएर एकैपटक सम्पूर्ण उपभोक्ताको स्वास्थय विमा र नवीकरण गराइएको छ । जम्मा २९ जनाको नवीकरण तथा १९ जनाको नयाँ स्वास्थ्य विमा गरिएकोमा थप १२ जनाको पनि चाँडै स्वास्थ्य विमा गराइने अध्यक्ष गोपाल श्रेष्ठले जानकारी दिनुभयो ।
कार्यक्रममा बोल्दै उहाँले स्वास्थ्य विमा गराउन नसक्ने विपन्न परिवारलाई प्राथमिकतामा राखेर छनौट गरि स्वास्थ्य विमा गराइएको बताउनुभयो । उहाँले स्वास्थ्य विमा गरेपछि त्यसको सदुपयोग गर्नुपर्नेमा समेत जोड दिनुभयो ।
कार्यक्रममा लेटाङ ३ का वडाध्यक्ष डम्बर बहादुर राईले कमलपुर सामुदायीक वन उपभोक्ता समूह देशकै नमूना वन समूहको रुपमा पुरस्कृत भएको बताउँदै प्रशंशायोग्य काम गर्दै आएको उल्लेख गर्नभुयो ।
यस्तै सामुदायीक वन उपभोक्ता महासंघका केन्द्रीय उपमहासचिव सीता श्रेष्ठ, नगर महासंघका अध्यक्ष आनन्दसागर तिम्सिना लगायतका अतिथिहरुले विपन्न परिवारको स्वास्थ विमा गराउँदै सामाजिक उत्तरदायीत्व बहन गरेकोमा वन उपभोक्ता समूहलाई धन्यवाद दिनुभयो ।
कमलपुर साुमदायीक वन समूहले हरेक वर्ष महिलाहरुलाई सेनेटरी प्याड वितरण, लामखुट्टेबाट बच्न झूल वितरण, कृषकहरुलाई टनेल वितरण लगायतका काम गर्दै आएको छ ।
