लेटाङ । नेकपा एमाले कोशी प्रदेशका अध्यक्ष घनश्याम खतिवडाले सबै हिसावले उपयुक्त व्यक्ति भएकाले नै पार्टीले इलाम क्षेत्र नम्बर २ मा सुहाङ नेम्वाङलाई उम्मेदवार बनाएको बताउनु भएको छ । शुक्रबार मोरङको लेटाङमा नेकपा एमाले नगर कमिटीको वैठकलाई सम्बोधन गर्दै अध्यक्ष खतिवडाले सबै हिसावले मूल्यांकन गर्दा चुनाव जित्नका लागि सुहाङ नेम्वाङ नै उपयुक्त हुने विश्लेषणका साथ उम्मेदवार बनाइएको बताउनु भयो ।
उहाँले सुहाङ युवा भएको, कानुनको विद्यार्थी भएको तथा राजनीतिप्रति सचेत पढेलेखेको व्यक्ति भएकाले समेत उपयुक्त उम्मेदवार भएको उल्लेख गर्नुभयो । सुहाङको उम्मेदवारीलाई लिएर राजतन्त्रको झल्को आएको भन्नु बेतुकको कुरा भएको बताउँदै अध्यक्ष खतिवडाले सुहाङलाई सुवासको छोरा भएर होइन पढेलेखेको राजनीतिप्रति सचेत युवा भएकाले पार्टीले टिकट दिएको बताउनुभयो ।
राजतन्त्रको जस्तो हो भने सुहाङलाई नभइ सुवास नेम्वाङका जेठा छोरालाई टिकट दिइने भन्दै उहाँले शोकको संवेदनालाई प्रयोग गरिएको भन्ने कुरामा पनि कुनै तुक नभएको दावी गर्नुभयो ।
“शोकको समवेदनालाई बाँड्न खोजिएको भए सुवास नेम्वाङकी श्रीमतीलाई, भाउजूलाई टीकट दिइन्थ्यो, तर हामीले कान्छो छोरालाई टिकट दियौं ।” उहाँले भन्नभयो, “किनभने उनी वकिल पनि हुन्, एलएलएम पढेका छन, योग्य पनि छन्, युवा आवश्यकता हो भनेर हामीले सुझबुझका साथ टीकट सुहाङलाई टिकट दिएका छौं, सुवासको छोरा भएर होइन ।”
उहाँले पार्टीले ६ जनाको नाम सिफारिस गरि पठाएकोमा स्थानीय पार्टी नेताहरु तथा इलामेली जनताको सुझावको आधारमा समेत सुहाङलाई टीकट दिएको उल्लेख गर्नुभयो । अध्यक्ष खतिवडाले लेटाङका पार्टी कार्यकर्ताहरुलाई इलाममा रहेका आफ्ना आफन्तहरुसँग कुरा गरि सुहाङका लागि भोट माग्न समेत आग्रह गर्नुभयो ।
