लेटाङ । लेटाङ नगरपालिका वडा नं ७ समलामा प्रथम समला साँस्कृतिक मेला तथा भलिवल प्रतियोगिता सञ्चालन हुने भएको छ । समला पर्यटन विकास समिति र समला खेलकुद समितिको संयुक्त आयोजनामा जेठ ९ गतेदेखि ११ गतेसम्म साँस्कृतिक मेला तथा भलिवल प्रतियोगिता सञ्चालन गर्न लागिएको हो ।
किराँतीहरुको महान चाड उभौली पर्वको अवसरमा समला क्षेत्रको पर्यटन प्रवर्धन, किराँत संस्कृतिको प्रचार प्रसार तथा खेल क्षेत्रको विकास गर्ने उद्देश्यले समलामा पहिलो पटक एकैसाथ साँस्कृतिक मेला तथा भलिवल प्रतियोगिता सञ्चालन गर्न लागिएको हो । भलिवल प्रतियोगितमा मोरङसहित पाँचथर, धनकुटा र इलाम लगायत जिल्लाका टीमले सहभागिता जनाउने छन् । प्रतियोगितामा प्रथम हुने टीमलाई नगद ४० हजारसहित ट्रफि तथा दोश्रो हुनेलाई नगद २० हजारसहित ट्रफि प्रदान गरिने आयोजक समला पर्यटन विकास समितिका अध्यक्ष अजय राईले जानकारी दिनुभयो ।
यसैगरि साँस्कृतिक मेलामा किराँत राईहरुको साकेला नाचमा रमाउन तथा परम्परागत परिकारहरुको स्वाद समेत चाख्न पाइने आयोजकले जनाएको छ ।
समलाबाट सूर्योदय र सूर्यास्तको दृश्यावलोकनका साथै झापा र मोरङका तराईंका फाँटको मनामोहक दृश्य पनि देख्न सकिन्छ । साथै अहिलेको गर्मि मौसममा समेत चिसो हावा चलिरहने समला क्षेत्र पछिल्लो समय आकर्षक पर्यटकीय गन्तव्यको रुपमा विकास भएको छ । समला साँस्कृतिक मेला तथा भलिवल प्रतियोगिताको निहुँमा समला पुग्नेहरुले चर्को गर्मीमा निकै शितलताको अनुभुति गर्न पाउने छन् ।
