इटहरी । जयन्ती विन्धवासिनी विद्यासदन इटहरीले यसवर्ष पनि एसइइ परीक्षामा सतप्रतिशत विद्यार्थी उत्तीर्ण गराउन सफल भएको छ । यस वर्षको एसइइ परीक्षामा १९ जना विद्यार्थी सहभागी भएकोमा सबै विद्यार्थी उत्कृष्ट अंकका साथ उत्तीर्ण भएका छन् ।
१९ जना मध्ये ८ जना विद्यार्थी ए प्लस र ११ जना ए ग्रेडका साथ उत्तिर्ण भएका छन् । जसमध्ये स्पार्कल अधिकारी ३ दशमलव ८४ जीपीएका साथ विद्यालय प्रथम भएका छन् भने सोनीया अली ३ दशमलव ७९ जीपीए सहित छात्रातर्फ उत्कृष्ट तथा विद्यालयको तेश्रो भएकी छन् । यस्तै ३ दशमलव ८३ जीपीए ल्याएका देवराज तामाङ विद्यालयबाट दोश्रो भएका छन् ।
२०६२ सालमा स्थापना भएको जयन्ती विन्धवासिनी विद्यासदन इटहरीले २०७२ सालदेखि एसइइ परीक्षामा विद्यार्थीहरुलाई सहभागि गराउँदै आएको छ । यसवर्ष नयाँ पद्धतिमा नजिता प्रकाशन हुँदा धेरै विद्यालयहरुको नतिजा निराशाजनक आएको बेला इटहरी–८ गैसारमा रहेको जयन्ती विन्धवासिनी विद्यासदन इटहरीले सतप्रतिशत विद्यार्थी उत्तिर्ण गराउँदै आफूलाई अब्बल सावित गरेको छ ।
२०७५ सालदेखि एसइइमा सतप्रतिशत नतिजा निकाल्दै आएको विद्यालयले विद्यार्थीहरुलाई न्यून शुल्कमा गुणस्तरीय शिक्षा प्रदान गर्दै आएको प्रिन्सिपल मनिस राईले जानकारी दिनुभयो ।
