लेटाङ । लेटाङ खेलकुद महोत्सव २०८१ अन्तरगत आज सोमबार पुरुष फुटबल, पुरुष भलिवल, महिला भलिबल र क्रिकेट तर्फको सेमीफाइनल खेल सम्पन्न भएका छन् । फुटबलतर्फ लेटाङ ३ र ६ फाइनलमा पुगेका छन् भने पुरुष भलिवलतर्फ वडा नम्बर १ र ७ , महिला भलिवलतर्फ वडा नम्बर ७ र ९ तथा क्रिकेटतर्फ लेटाङ अस्पताल र राजारानी क्रिकेट क्लव फाइनलमा प्रवेश गरेका छन् ।
यसैगरि आजै व्याडमिन्टन र टेबल टेनिसका सबै खेल सम्पन्न भएका छन् । टेबल टेनिसतर्फ लेटाङ ४ का युवराज लावती च्याम्पियन भएका छन् । यसैगरि व्याडमिन्टमा ए डिभिजनतर्फ लेटाङ ८ का राजन राई र लेटाङ ४ का निर्मलसागर राईको जोडी च्याम्पियन बनेको छ भने वी डिभिजनतर्फ ल लेटाङ ६ का विकास अधिकारी र लेटाङ ९ की लिला तुम्साको जोडी च्याम्पियन बनेको छ ।
लेटाङ ३ र ६ पुरुष फुटबलको फाइनलमा
लेटाङ खेलकुद महोत्सव अन्तरगत पुरुष फुटबलतर्फ आज सोमबार सम्पन्न सेमीफाइनल खेलमा विजयी हुँदै वडा नम्बर ३ र ६ फाइनलमा प्रवेश गरेका छन् । जनसेवा खेल मैदानमा आज भएको पहिलो सेमीफाइनल खेलमा वडा नम्बर २ लाई १–० गोल अन्तरले पराजित गर्दै वडा नम्बर ६ ले उपाधि भिडन्त पक्का गरेको हो ।
वडा नम्बर ६ का अनिल राईले दोश्रो हाफको २५ मिनेटमा गरेको गोल नै जितका लागि निर्णायक भयो । यसैगरि आजै भएको दोश्रो सेमीफाइनल खेलमा वडा नम्बर ८ लाई २–१ ले पराजित गर्दै वडा नम्बर ६ पनि फाइनलमा प्रवेश गरेको छ । खेलमा वडा नम्बर ८ ले सन्दीप राईको गोलमार्फत शुरुवाती अग्रता लिएपनि सो अग्रता जोगाउन नसक्दा फाइनल पुग्नबाट चुकेको छ । वड नम्बर ८ का लागि पहिलो हाफको २५ औँ मिनेटमा सन्दीप राईले गोल गर्दै अग्रता दिलएकामा दोश्रो हाफको १८ औँ मिनेटमा वडा नम्बर ६ ले गोल गर्दै खेललाई बराबरीमा ल्याएको थियो ।
वडा नम्बर ८ का रुपेन मगरले वडा नम्बर ६ का अनुप शिवालाई डिबक्स एरियामा फल गरेपछि पाएको पेनाल्टीलाई सदुपयोग गर्दै वडा नम्बर ६ का विजयी लिम्बूले बराबरी गोल फर्काएका हुन् । त्यसपछि लेटाङ ६ का अनुप शिवाले दोश्रो हाफको २६ औँ मिनेटमा गोल गर्दै आफ्नो टोलीलाई फाइनलमा पुर्याएका हुन् ।
निकै प्रतिस्पर्धात्म खेलमा शुरुवाती अग्रतालाई टिकाउन नसक्दा वडा नम्बर ८ ले भने पराजय ब्यहोरेको छ । अब वडा नम्बर ८ ले भोलि मंगलबार दिउँसो ३ बजे तेश्रो स्थानका लागि वडा नम्बर २ सँग प्रतिस्पर्धा गर्नेछ । वडा नम्बर ३ र ६ बीचको फाइनल खेल भने फागुन ७ गते दिउँसो हुने फुटबल खेलका फोकल पर्सन इन्द्र राईले जानकारी दिनुभयो । लेटाङ खेलकुद महोत्सव अन्तरगत फुटबलतर्फ वडा नम्बर ७ बाहेक ८ वटा वडाका टोलीले प्रतिस्पर्धा गरेका थिए ।
पुरुष भलिवलतर्फ वडा नम्बर १ र ७ फाइनलमा
लेटाङ खेलकुद महोत्सव अन्तरगत पुरुष भलिवलतर्फ आज सोमबार सम्पन्न खेलमा विजयी हुँदै वडा नम्बर १ र ७ फाइनलमा पुगेका छन् । आज भएको पहिलो सेमीफाइनल खेलमा वडा नम्बर ६ लाई ३–१ को सेटमा पराजित गर्दै वडा नम्बर ७ फाइलनमा पुगेको हो ।
यसैगरि दोश्रो सोमीफाइनल खेलमा वडा नम्बर १ ले वडा नम्बर ८ लाई ३–२ को सेटमा पराजित गर्दै वडा नम्बर ७ सँगको उपाधि भिडन्त पक्का गरेको छ । वडा नम्बर १ र ७ बीचको फाइनल खेल भोलि मंगलबार दिउँसो २ बजे हुनेछ भने तेश्रो स्थानका लागि भोलि विहान १० बजे वडा नम्बर ८ र ६ भिड्नेछन् ।
महिला भलिवलतर्फ वडा नम्बर ७ र ९ फाइनलमा
लेटाङ खेलकुद महोत्सव अन्तरगत आज सोमबार सम्पन्न महिला भलिवलतर्फको खेलमा विजयी हुँदै वडा नम्बर ७ र ९ फाइनलमा पुगेका छन् । आज सोमबार भएको पहिलो सेमीफाइनल खेलमा वडा नम्बर ३ लाई ३–० को सोझो सेटमा पराजित गर्दै वडा नम्बर ७ ले फाइनलमा स्थान बनाएको हो ।
यसैगरि दोश्रो सेमीफाइनल खेलमा वडा नम्बर ५ लाई ३–१ को सेटमा पराजित गर्दै वडा नम्बर ९ फाइनलमा प्रवेश गरेको छ । वडा नम्बर ७ र ९ बीचको फाइनल खेल भोलि मंगलबार दिउँसो २ बजे हुनेछ भने तेश्रो स्थानका लागि भोलि विहान १० बजे वडा नम्बर ३ र ५ भिड्नेछन् ।
क्रिकेटको फाइनलमा लेटाङ अस्पताल र राजारानी भिड्ने
लेटाङ खेलकुद महोत्सव अन्तरगत क्रिकेटतर्फको फाइनलमा लेटाङ अस्पताल र राजारानी क्रिकेट क्लव भिड्ने भएका छन् । आज सोमबार भएको दोश्रो सेमीफाइनल खेलमा चिसाङ वारियर्सलाई ७६ रनले पराजित गर्दै लेटाङ अस्पताल फाइनलमा पुगेको हो ।
सुरुमा व्याटिङ गरेको लेटाङ अस्पतालले पुरा ओभर खेल्दै ५ विकेटको क्षतिमा २ सय रनको विशाल योगफल तयार गरेको थियो । २ सय १ रनको लक्ष्य पछ्याउँदै जवाफी ब्याटिङमा उत्रिएको चिसाङ १९ ओभरमा अलहाउट हुँदै १ सय २४ रनमा सिमित भयो ।
यसअघि हिजो भएको खेलमा कीर्तिमानलाई ३१ रनले पराजित गर्दै राजारानी कृकेट क्लव फाइनलमा पुगिसकेको थियो । लेटाङ अस्पताल र राजारानी कृकेट क्लवबीचको फाइनल खेल भोलि मंगलबार दिउँसो १ बजे हुनेछ भने चिसाङ वारियर्स र कीर्तिमान विहान ९ बजे तेश्रो स्थानका लागि प्रतिस्पर्धा गर्नेछन् । लेटाङ खेलकुद महोत्सव अन्तरगत क्रिकेट प्रतियोगितामा ५ वटा टीम सहभागी थिए ।
व्याडमिन्टनतर्फ राजन र निर्मलसागर तथा विकास र लिलाको जोडि च्याम्पियन
लेटाङ खेलकुद महोत्सव २०८१ अन्तरगत आज व्याडमिन्टनतर्फका सबै खेल सम्पन्न भएका छन् । व्याडमिन्टनमा ए डिभिजन र बी डिभिजन गरि २ समूह निर्माण गरि खेलाडीहरुलाई प्रतिस्पर्धा गराइएकोमा सबै खेल आजै सम्पन्न भएका छन् ।
ए डिभिजनतर्फ लेटाङ ८ का राजधन राई र लेटाङ ४ का निर्मलसागर राईको जोडी च्याम्पियन बनेको छ । लेटाङ ५ का कृष्णराज राई र लेटाङ ४ का विष्णु मगरको जोडीलाई २–० को सोझो सेटमा पराजित गर्दै राजधन र निर्मलसागरको जोडि च्याम्पियन बन्न सफल भएको हो ।
यसैगरि वी डिभिजनतर्फ लेटाङ ६ का विकास अधिकारी र लेटाङ ९ की लिला तुम्साको जोडी च्याम्पियन बनेको छ । उनीहरु लेटाङ ३ का मञ्जित खनाल र लेटाङ ५ का सन्तोष श्रेष्ठको जोडीलाई पराजित गर्दै च्याम्पियन बनेका हुन् । खेलमा जम्मा ३३ जना खेलाडीहरुले सहभागीता जनाएको व्याडमिन्ट खेलका फोकल पर्सन हिक्मत बहादुर खड्काले जानकारी दिनुभयो ।
ए डिभिजनतर्फ प्रथम हुनेल १६ हजार र दोश्रो हुनेले ८ हजार पुरस्कार पाउनेछन् भने वी डिभिजनतर्फ प्रथम र दोश्रो हुनेले ८ हजार पुरस्कार पाउनेछन् । उनीहरुलाई फागुन ७ गते हुने समापन समारोहमा पुरस्कार वितरण गरिने छ ।
टेबल टेनिसतर्फ लेटाङ ४ का युवराज लावती च्याम्पियन
लेटाङ खेलकुद महोत्सव अन्तरगत आज सोमबार सम्पन्न टेबल टेनिस खेलमा विजयी हुँदै लेटाङ ४ का युवराज लावती च्यम्पियन बनेका छन् । व्याडमिन्टनतर्फ जम्मा १४ जना खेलाडीले नाम दर्ता गराएको भएपनि १२ जना खेलाडीले सहभागीता जनाएकोमा लेटाङ ४ का युवराज लावती च्याम्पियन बन्न सफल भएका हुन् ।
उनले फाइनल खेलमा लेटाङ ३ का नरबहादुर गुरुङलाई ३–० को सोझो सेटमा पराजित गर्दै उपाधि जितेका हुन् । लेटाङ ४ का युवराज लावतीसँग पराजित भएका लेटाङ ३ का नरबहादुर गुरुङ दोश्रो हुँदा लेटाङ ८ का आयुस चेम्जोङ तेश्रो भएका छन् ।
तेश्रो स्थानका लागि भएको खेलमा नवीन राईलाई ३–१ को सेटमा पराजित गर्दै आयुस चेम्जोङ विजयी भएका हुन् । च्याम्पियन बनेका युवराजले ट्रफिसहित ८ हजार, दोश्रो भएका नरबहादुरले ५ हजार र तेश्रो भएका आयुसले ३ हजार नगद पुरस्कार पाउनेछन् ।
उनीहरुलाई फागुन ७ गते हुने समापन समारोहमा पुरस्कार वितरण गरिने टेबल टेनिस खेलका फोकल पर्सन हरिचन्द्र राईले जानकारी दिनुभयो ।
