लेटाङको एसइइ नजितामा दोब्बर बढी सुधार, ७४.६८ प्रतिशत उत्तीर्ण

१४ असार २०८२, शनिबार

लेटाङ । लेटाङ नगरपालिकाको २०८१ को एसइइ परीक्षाको नजितामा सतप्रतिशत भन्दा बढी सुधार भएको छ । शुक्रबार सार्वजनिक भएको एसइइ परीक्षाको नतिजामा गतवर्षको तुलानामा सतप्रतिशत बढी अर्थात दोब्बर भन्दा बढी प्रतिशतमा विद्यार्थी उत्तीर्ण भएका हुन् ।

सामुदायिक विद्यालय र नीजि विद्यालय गरि कूल २१ वटा विद्यालयबाट ६ सय २० जना विद्यार्थीले एसइइ परीक्षा दिएकामा ७४ दशमलव ६८ प्रतिशत अर्थात ४ सय ६३ जना विद्यार्थीले १ दशमलव ७ भन्दा माथिको जीपीए ल्याएर उत्तीर्ण भएका छन् । गतवर्ष भने ३५ दशमलव ६४ प्रतिशत मात्र विद्यार्थी उत्तीर्ण भएका थिए ।

यसवर्षको नजितामा सामुदायिक र नीजि दुवैतर्फको एकमुष्ट नजितामा दोब्बर भन्दा बढी सुधार भएको छ भने सामुदायिक विद्यालयतर्फ मात्र गतवर्ष भन्दा झण्डै दोब्बर सुधार भएको छ । सामुदायिक विद्यालयबाट यसवर्ष ४ सय २६ जना विद्यार्थीले एसइइ परीक्षा दिएकामा २ सय ७८ अर्थात ६५ दशमलव २६ प्रतिशत विद्यार्थी उत्तीर्ण भएका छन् । जुन गतवर्षको सामुदायिक र नीजि दुवैतर्फको उत्तीर्ण प्रतिशत ३५ दशमलव ६४ को झण्डै दोब्बर हुन आउँछ ।

सामुदायिक विद्यालयतर्फ प्रतिशतका आधारमा लेटाङ ७ पित्लुम्बा स्थित लक्ष्मी माविले सबैभन्दा बढी ८५ दशमलव ७१ प्रतिशत विद्यार्थी उत्तीर्ण गराउन सफल भएको छ । तर विद्यार्थी संख्या भने निकै न्यून १४ जनामा १२ जना उत्तीर्ण भएका हुन् ।

विद्यार्थी संख्याको आधारमा हेर्ने हो भने सबैभन्दा बढी लेटाङ ४ स्थित शान्ति भगवति माविबाट १ सय ३३ जनामा ९७ जना उत्तीर्ण भएका छन् भने लेटाङ २ स्थित लक्ष्मी माविबाट ७८ मा ५६ जना उत्तीर्ण भएका छन् ।

सबैभन्दा कम प्रतिशत विद्यार्थी उत्तीर्ण गराउने विद्यालयमा लेटाङ ७ वारांगीस्थित महेन्द्र मावि र लेटाङ ९ जाँतेस्थित श्री मावि रहेका छन् । महेन्द्र माविबाट ३१ दशमलव ८२ प्रतिशत अर्थात २२ जनामा ७ जना उत्तीर्ण भएका छन् भने श्री मावि जाँतेबाट ५२ दशमलव ३८ अर्थात ४२ जनामा २२ जना मात्र विद्यार्थी उत्तीर्ण भएका छन् ।

लेटाङ नगरपालिकाले एसइइ परीक्षाको नतिजामा सुधार ल्याउन विद्यार्थीहरुका लागि निःशुल्क कोचिङको कक्षा सञ्चालन गरेको थियो । नगरपालिकाले सबै माध्यमकि विद्यालयमा अंग्रेजी, गणित र विज्ञान विषयको कोचिङ कक्षा सञ्चालन गरेकाले पनि यसवर्ष सामुदायिक विद्यालयको नजितामा झण्डै दोब्बर सुधार आएको शिक्षा शाखा प्रमुख कृष्णराज राईले बताउनुभयो ।

लेटाङ नगरपालिका सबै विद्यालयहरुको विवरण (सामुदायिक र नीजि):