लेटाङ । आज नेप्से परिसूचक ०.५२ प्रतिशत अर्थात १४.१७ अङ्क बढेर २ हजार ७२६.७२ बिन्दुमा अडिएको छ ।
आज ३३८ स्टकको १ करोड ७७ हजार २२२ कित्ता शेयर ५७ हजार ७८२ पटक किनबेच हुँदा ४ अर्ब ६९ करोड ३४ लाख ४९ हजार ३७० रुपैयाँको शेयर किनबेच भएको छ । हिजो ५ अर्ब १८ करोड ७४ लाख रुपैयाँको शेयर किनबेच भएको थियो ।
नेप्सेमा सूचीकृत १३ वटा समूहमध्ये २ वटा बाहेक सबैमा हरियाली छाएको थियो । आज व्यापार समूह सर्वाधिक २.५८ प्रतिशतले बढेको छ । लगानी र अन्य समूह मात्रै क्रमशः ०.४२ र ०.०८ प्रतिशतले घटेका छन् ।
आज रिलायन्स स्पिनिङ मिल्सको सर्वाधिक २८ करोड ३३ लाख १९ हजार १४४ रुपैयाँको शेयर किनबेच भएको छ । आँखुखोला जलविद्युत्, रिडी पावर, सोलु हाईड्रो र एनआरएन इन्फ्रास्ट्रक्चर उच्च कारोबार गर्ने अन्य कम्पनीमा परेका छन् ।
एभरेष्ट कलर लिमिटेडको शेयरमूल्य सर्वाधिक अर्थात् १५ प्रतिशतले बढ्दा स्नो रिभर्सको शेयरमूल्य १३.७१ प्रतिशत, एपोलो हाईड्रोको ११.०४ र शिखर पावर डेभलपमेन्टको सेयरमूल्य ८.४६ प्रतिशतले बढेको छ ।
आज कुथेली बुखरी स्मल हाईड्रोको शेयरमूल्य सर्वाधिक अर्थात् १५ प्रतिशतले घटेको छ । बुङ्गल हाईड्रोको शेयरमूल्य ९.९३ र रिलायन्स स्पीनिङ मिल्सको शेयरमूल्य ४.४८ प्रतिशतले घटेको छ ।
बजार बढेसँगै समग्र बजार पूँजीकरण ४६ खर्ब ८६ अर्ब ५ करोड ८३ लाख ९ हजार ३८७ रुपैयाँ कायम भएको छ ।
