सुन्दरहरैंचा । मोरङको सुन्दरहरैंचा ४ स्थित वाँसवारी पानीट्याङ्की टोलका वासिन्दा आफ्नो टोललाई नमूना टोल बनाउने अभियानमा जुटेका छन् । टोल विकास संस्थाको अगुवाइमा भएको अभियान अन्तरगत संस्थाले साप्ताहिक रुपमा हरेक शनिबार विभिन्न सामाजिक गतिविधिहरु सञ्चालन गर्न थालेको हो । संस्थाले स्थानीय भलुवा खोलाको सरसफाई गर्दै अभियानको शुभारम्भ गरेको छ ।
वर्षायाममा स्थानीय भलुवा खोला थुनिएर बाढी वस्तीमा पस्ने गरेकाले वर्षायाम अघि नै सरसफाई गरि झोड्ने काम गरिएको स्थानीय समाजसेवी सागर प्र्र्र्रसाद जम्मर कट्टेलले जानकारी दिनुभयो । सुन्दरहरैंचा ४ का वडाध्यक्ष कैलाश बस्नेतको समेत उपस्थितिमा टोल विकासका पदाधिकारीहरु, सदस्यहरु र स्थानीयवासीको स्वतस्फूर्त सहभागितामा सरसफाई गरिएको उहाँको भनाइ छ ।
टोली विकास संस्थाकी अध्यक्ष भीमा राई कार्कीको अगुवाइमा टोललाई नमुना बनाउने अभियान अन्तरगत पहिलोचरणमा सरसफाई गरिएको हो । अगामी दिनमा पनि साप्ताहिक रुपमा सरसफाई, वृक्षारोपण, रक्तदान, क्षमता विकास तालिम, शीप मुलक तालिम लगायतका कार्यक्रम सञ्चालन गर्ने बताइएको छ ।
