- रामचन्द्र निरौला
लेटाङ । १ सय १५ औं अन्तर्राष्ट्रिय महिला दिवसको अवसरमा शनिबार लेटाङ नगरपालिकामा भव्य कार्यक्रम गरिएको छ ।
लेटाङ नगरपालिकाकी उपप्रमुख कृष्णकुमारी निरौलाको अध्यक्षतामा नगरपालिका परिसरमा भएको कार्यक्रममा नगरपालिकाका जनप्रतिनिधिहरु, कर्मचारी, विभिन्न संघ सँस्थाका प्रतिनिधि तथा स्थानीय महिलाहरूको उल्लेखनीय उपस्थिति रहेको थियो ।
सो अवसरमा हाजिरी जवाफ प्रतियोगिता सञ्चालन गर्नुका साथै म्युजिकल चेयर र तातो आलु जस्ता मनोरञ्जनात्मक खेल पनि खेलाइएको थियो ।
वडास्तरीय हाजिरी जवाफ प्रतियोगिता आयोजना गरिएकोमा वडा नम्बर २ प्रथम, वडा नम्बर ९ दोस्रो र वडा नम्बर १ तेस्रो भएका छन् ।
यस्तै म्युजिकल चेयरमा मिनाक्षी राई प्रथम, यसोदा दुलाल दोस्रो र मिरा निरौला तेस्रो भएका छन् भने तातो आलु प्रतियोगितामा सिद्दिमा राई प्रथम, तृष्णा घिमिरे दोस्रो, र एलिशा चौधरी तेश्रो भएका छन् । विजेता सबै जनालाई नगद पुरस्कार प्रदान गरिएको छ ।
महिला दिवसको अवसरमा अनौपचारिक क्षेत्रमा श्रम गर्ने ९ जना महिलाहरूलाई उनीहरुको योगदानको कदर गर्दै सम्मानपत्र र मायाको चिनो प्रदान गरि विशेष सम्मान गरिएको छ । कार्यक्रममा नगर प्रहरी अनिता लिम्बूले आकर्षक मारुनी नृत्य प्रस्तुत गरिन् भने लेटाङ ५ का महिलाहरुले नौमती बाजा बजाएर कार्यक्रमलाई उल्लासपूर्ण बनाएका थिए ।
