लेटाङ । नेपाली कम्युनिष्ट आन्दोलनका अग्रज व्यक्तित्व वीके देवकोटाको दोश्रो स्मृति दिवस आइतबार लेटाङमा विविध कार्यक्रम गरि मनाइएको छ । लेटाङ प्याव्सनको आयोजना तथा लेटाङ ५ स्थित लिटिल फ्लावर्स बोर्डिङ स्कुलको व्यवस्थापनमा वक्तृत्वकला प्रतियोगिता सहितका कार्यक्रम गरि देवकोटोका स्मृति दिवस मनाइएको हो ।
देवकोटाले स्थापना गरेको विद्यालय लिटिल फ्लावर्स बोर्डिङ स्कुलको सभाहलमा साहित्यकार अनिल पौडेलको प्रमुख आतिथ्यतमा पूर्वसांसद तथा साहित्यकार हर्कमान तामाङ, समालोचक लेखनाथ न्यौपाने, लेटाङ नगरपालिकाका प्रमुख भूपेन्द्रकुमार लावती, उपप्रमुख कृष्णकुमारी निरौला लगायतको विशिष्ट आतिथ्यतामा देवकोटाको स्मृति दिवस मनाइएको हो ।
देवकोटाको स्मृति दिवसको अवसरमा लिटिल फ्लावरर्स बोर्डिङ स्कूल परिसरमा देवकोटाको स्मृतिमा निर्माण गरिएको पुष्प बाटिका र सभाहलको समेत उद्घाटन गरिएको छ । कार्यक्रमका प्रमुख अतिथि साहित्यकार अनिल पौडेल, लेटाङ नगरपालिकाका नगर प्रमुख भूपेन्द्रकुमार लावती लगायतका अतिथिहरुले सभाहल र बाटिकाको उद्घाटन गर्नुभयो ।
सो अवसरमा लेटाङका नीजि विद्यालयका विद्यार्थीहरुबीच भएको वक्तृत्वकला प्रतियोगितामा लिटिल फ्लावर्स वोर्डिङ स्कूलकी छात्रा आयुस्मा लामा प्रथम भएकी छन् ।
यस्तै नोवेल एजुकेशन फाउण्डेशनकी छात्रा आकृति खड्का दोश्रो, पब्लिक सेन्टर स्कुलकी छात्रा इक्सा लिम्बू तेश्रो र मिनर्वा सकेण्डरी स्कूलकी छात्रा एलिना लिम्बू चौथो भएकी छन् ।
उनीहरुलाई प्रमाणपत्रसहित नगद पुरस्कार प्रदान गरिएको छ । सोही अवसरमा लिटिल फ्लावर्स बोर्डिङ स्कुलबाट एसइइ परीक्षामा उत्तीर्ण हुने विद्यार्थीहरुलाई सम्मान पनि गरिएको छ ।
कार्यक्रममा बोल्दै वक्ताहरुले वीके देवकोटाको व्यक्तित्व तथा उहाँले नेपाली कम्युनिष्ट आन्दोलनमा पुर्याउनु भएको योगदानको चर्चा गर्नु भएको छ ।
