मोरङको लेटाङ नगरपालिका वडा नम्बर ८ स्थित जाँते बजारमा वसपार्क निर्माण कार्य सुरु गरिएको छ । लामो समयसम्म बसपार्क नहुँदा समस्या हुँदै आएकोमा जाँते बजारको डाँडागाउँमा स्थानीय दाताहरुले वसपार्क निर्माणका लागि जग्गा दान दिएपछि निर्माण प्रकृया सुरु गरिएको हो ।
वसपार्क निर्माणका लागि लेटाङ नगरपालिकाले ६ लाख रुपैयाँ बजेट उपलब्ध गराएको छ भने उपभोक्ताहरुबाट ७३ हजार बराबरको जनसहभागिता रहनेछ । हाल पहिलो चरणमा वसपार्कको बाहिरी सिमाना निर्धारणका लागि ४ फुट अग्लो पर्खाल लगाउने काम सुरु गरिएको छ । पौस १६ गते सम्झौता गरि काम थालिएकोमा चैत्र मसान्तसम्म निर्माण गरिसकिने उपभोक्ता समितिका अध्यक्ष सुधिर कुमार बोहोराले जानकारी दिनुभयो ।
वसपार्क निर्माणका लागि स्थानीय बल बहादुर लिम्बूबाट २ कठ्ठा, जयप्रसाद महतबाट २ कठ्ठा, पदम प्रसाद लावतीबाट २ कठ्ठा र उपभोक्ता समिति अध्यक्ष सुधिर कुमार बोरोबाट १० धुर जग्गा प्राप्त भएको छ । घेरावारा सकिएलगत्तै वसपार्कसम्म जाने दुइतर्फि बाटो निर्माण गरेर वसपार्क सञ्चालन गरिने बताइएको छ ।
वसपार्क निर्माण भएपछि धनकुटा लगायत लेटाङकै पहाडी क्षेत्रबाट आउने सवारी साधन तथा जाँतेबाट विराटनगर, धरान, काठामाडौं, काँकडभिट्टा लागयतका सहरसम्म छुट्टे सवारी साधन एकैठाउँमा व्यवस्थापन गरिने अध्यक्ष बोहोराले जानकारी दिनुभयो । हेर्नुहोस् भिडियो समाचार ।
