सुन्दरहरैंचा । सुन्दरहरैंचामा विहीबारदेखि सुरु भएर शनिबार सम्पन्न भएको पालिका स्तरीय उपमेयर कप महिला भलिवल प्रतियोगिताको उपाधि आयोजक सुन्दरहरैंचाले जितेको छ । शनिबार भएको फाइनल खेलमा लेटाङ नगरपालिकामाथि सोझो सेटमा सहज जीत दर्ता गर्दै सुन्दरहरैंचाले उपाधि जितेको हो । विजेता बनेको आयोजक सुन्दरहरैंचाले ट्रफिसहित भ्याटबाहेक नगद ५० हजार पाएको छ भने उपविजेता बनेको लेटाङले ट्रफिसहित भ्याटबाहेक नगद २५ हजार हात पारेको छ ।
समापन कार्यक्रमका प्रमुख अतिथि जिल्ला समन्वय समिति मोरङका प्रमुख अजम्वर राई, सुन्दरहरैंचा नगरपालिकाका नगर प्रमुख केदार प्रसाद गुरागाईं, लेटाङ नगरपालिकाका प्रमुख भूपेन्द्र कुमार लावती, सुन्दरहरैंचा नगरपालिकाकी उपप्रमुख अकली चौधरी, लेटाङकी उपप्रमुख कृष्ण कुमारी निरौला लगायतका अतिथिहरुले विजेता तथा उपविजेतालाई ट्रफि तथा नगद पुरस्कार प्रदान गर्नुभयो ।
विजेता सुन्दरहरैंचाले सेमिफाइनलमा बेलबारीलाई तथा उपविजेता लेटाङले पथरीशनिश्चरेलाई पराजित गर्दै फाइलनमा पुगेका थिए । सुन्दरहरैँचा नगर खेलकुद विकास समितिको आयोजनामा सुन्दरहरैंचा १० स्थित सुकुना माविको खेल मैदानमा भएको प्रतियोगितामा सुन्दरहरैंचा, लेटाङ, बेलबारी, पथरीशनिश्चरे, रतुवामाई, केराबारी, कानेपोखरी र बुढीगंगा गरि जिल्ला भरिका ८ वटा टीम सहभागी भएको सदस्यसचिव खड्गबहादुर श्रेष्ठले जानकारी दिनुभयो ।
