-तिलक राई
केराबारी । मोरङको केराबारी गाउँपालिका २ सिंहदेवीमा सम्पन्न प्रथम हिलेथाम फूटबल कपको उपाधि साँगुरीगढी धनकुटाले हात पारेको छ । सोमबार भएको फाईनल खेलमा साँगुरीगढी गाउँपालिका धनकुटाले मिक्लाजुङ गाउँपालिका मोरङलाई २ का बिरूद्ध ३ गोलले पराजित गर्दै उपाधि जितेको हो । विजेतका साँगुरीगढीले ट्रफिसहित नगद ७५ हजार हात पारेको छ ।
यता उपविजेतामा चित्त बुझाउन बाध्य मिक्लाजुङ गाउँपालिका मोरङले ट्रफिसहित नगद ५० हजार पाएको छ । मिक्लाजुङले सेमीफाइनलमा कानेपोखरीलाई पराजित गरेको थियो भने साँगुरीगढीले पथरीलाई पराजित गर्दै उपाधि भिडन्त पक्का गरेको थियो ।
हिलेथाम पर्यटन तथा खेलकुद विकास समिति केराबारी २ सिंहदेवीको आयोजनामा भएको प्रतियोगिताको उपाधि विजेता तथा उपविजेता टीमलाई कार्यक्रमका प्रमुख अतिथि केराबारी गाउँपालिका अध्यक्ष सुमन मिरिचिङले ट्रफि तथा नगद पुरस्कार प्रदान गर्नुभयो । यसैगरि उत्कृष्ट गोलकिपर, डिफेन्डर, म्यान अफ दी म्याच र सर्वाधिक गोलकर्तालाई समेत पुरस्कृत गरिएको छ ।
केराबारी गाउँपालिका वडा नम्बर २ को पर्यटन तथा खेलकुद क्षेत्रको विकास गर्ने उद्देश्यले आयोजना गरिएको प्रतियोगिताको मुख्य प्रायोजक केराबारी गाउँपालिका र वडा नम्बर २ रहेकोमा सिंहदेवी खेलकुद विकास समितिको समेत सहयोग रहेको थियो ।
शुक्रबारदेखि सुरु भएको प्रतियोगिता सोमबार सम्पन्न भएको हो । प्रतियोगितामा साँगुरीगढी, पथरी, कोनपोखरी, लेटाङ, चौविसे, मिक्लाजुङ गाउँपालिका र केराबारी गाउँपालिकाका २ वटा गरि ८ वटा टीम सहभागी रहेको आयोजक समितिका अध्यक्ष विक्रम शाहीले जानकारी दिनुभयो ।
