विराटनगर । बुधबार दिउँसो विराटनगर ७ सातघुम्तीस्थित कवाडी पसलमा आगलागी हुँदा २ जनाको मृत्यु भएको छ । आगलागीमा परि ४ जना घाइते भएका छन्, जसमध्ये २ जनाको अवस्था गंभीर रहेको छ । मृत्यु भएका २ जनामध्ये १ जनाको मात्र पहिचान खुलेको छ ।
आगलागीमा परि गंभीर घाइते भएका विराटनगर ६ बस्नेत अन्दाजी ४० वर्षका दीपक मण्डलको न्यूरो अस्पताल विराटनगरमा उपचारका क्रममा मृत्यु भएको हो । यस्तै आगलागी भएको ठाउँमा पहिचान खुल्न नसकेको अवस्थामा एकजना महिलाको शव भेटिएको जिल्ला प्रहरी कार्यालय मोरङले जनाएको छ ।
आगलागीमा परि विराटनगर ६ बस्ने आन्दाजी ६५ वर्षीया सुशीला पासवान र विराटनगर ६ कै अन्दाजी ६० वर्षीया रिता सरदार गंभीर घाइते भएका छन् । दुवै जनाको जिउ र हातखुट्टा जलेको पाइएको प्रहरीले जानकारी दिएको छ । यस्तै विराटनगर ६ बस्ने अन्दाजी ५८ वर्षीय किशोर पासवान र कटहरी ६ बस्ने अन्दाजी ३० वर्षीया पींकी कामत मध्यम घाइते भएका छन् । उनीहरु दुवै जनाको खुट्टाको भाग जलेको छ ।
यसैबीच घाइतेहरुलाई थप उपचारका लागि कीर्तिपुरस्थित जलन सम्बन्धी विशिष्टिकृत अस्पतालमा एयर एम्बुलेन्सद्वारा पठाइएको छ । कवाडीमा कार्यरत कामदारहरुले कवाडीखानाभित्र केहि दिनयता विद्यूत सर्ट भइरहेको र मर्मतका लागि आग्रह गर्दा संचालकहरुले अटेर गरेको बताएका छन् ।
उनीहरुले दिउँसो खाना खाएर आराम गरिरहेको अवस्थामा अचानक पड्किएको आवाज आएको र आगो फैलिएको बताए । आफूहरुले भागेर ज्यान जोगाएको कवाडीखानाकी एक महिला कामदारको भनाइ छ ।
