लेटाङ । लेटाङमा करिव २ करोडको लागतमा पुस्तकालय भवन बन्ने भएको छ । शान्ति भोलेन्टीयर एशोसिएसन एसभीएको आर्थिक सहयोगमा रीड नेपालमार्फत अनुदान सहयोगमा पुस्तकालय भवन बन्न लागेको हो । १२ वर्ष अघिदेखि लेटाङ पुस्तकालयको नाममा सञ्चालन गरिएको पुस्तकालयलाई शान्ति सामुदायिक पुस्तकालय तथा श्रोत केन्द्र नामाकरण गरि नयाँ ढाँचामा सञ्चालन गर्न लागिएको अध्यक्ष सुदेश वस्तीले जानकारी दिनुभयो ।
उहाँले पहिलो वर्ष रिड नेपालको सहयोगमा ३ तले सुविधा सम्पन्न भवन निर्माण हुने र दोश्रो वर्ष करिव ७० लाखको लागतमा विभिन्न शीपमुलक तालिमहरु निःशुल्क प्रदान गरिने पनि जानकारी दिनुभयो । श्री शान्ति भगवती मावि परिसरमा निर्माण हुने पुस्तकालय सुविधा सम्पन्न र व्यवसायीक सटरहरुसहितको हुने बताइएको छ ।
यसैबीच बुधबार पुस्तकालय सञ्चालनको विषयमा ३ दिने सामुदायिक परिचालन तालिम तथा कार्याशाला गोष्ठी पनि सम्पन्न भएको छ । शान्ति भोलेन्टीयर एशोसिएसन एसभीएको आर्थिक सहयोगमा रीड नेपालमार्फत अनुदान सहयोग कार्यक्रम सञ्चालन गर्ने विषयमा पुस्तकालयसँग सम्झौता भइ तयारी स्वरुप कार्याशाल गोष्ठी सम्पन्न गरिएको हो ।
लेटाङ ४ को सभाहलमा भएको गोष्ठीमा पुस्तकालय सञ्चालनका लागि गर्नुपर्ने तयारी तथा समुदायको परिचालन लगायतका विषयमा छलफल गरि विभिन्न समितिहरु निर्माण गरिएको छ । शान्ति भोलेन्टियर एशोसिएसन एसभीएका प्रतिनिधि गणेश लामा, रिड नेपालका साजन थापा तथा एलवी भण्डारीले गोष्ठीमा सहजिकरण गर्नुभयो ।
सोमबारदेखि सुरु भएको गोष्ठी आज बुधबार लेटाङ नगरपालिकाका नगर प्रमुख भूपेन्द्र कुमार लावतीको प्रमुख आतिथ्यतामा समापन गरिएको हो । कार्यक्रमा बोल्दै नगर प्रमुख लावतीले दातृनिकायहरुको सहयोगमा सुरु गरिएका कार्यक्रमहरुलाई दीर्घकालसम्म सञ्चालन गर्ने गरि तयारी गरेर लाग्नुपर्नेमा जोड दिनुभयो ।
यस्तै रिड नेपालका साजन थापाले पहिलो वर्षको कार्यक्रम अन्तरगत करिव २ करोडको लागतमा सुविधा सम्पन्न पुस्तकालय भवन निर्मण हुने र दोश्रोवर्ष समुदाय लक्षित विभिन्न शीपमुलक तालिम कार्यक्रम सञ्चालन गरिने जानकारी दिनुभयो ।
यस्तै पुस्तकालयका अध्यक्ष सुदेश वस्तीले पुस्तकालय भवन निर्माणका लागि समुदायको १० प्रतिशत लागत साझेदारी रहने भएकाले त्यसका लागि सहयोग गर्न नगरवासीमा आग्रह गर्नुभयो । पुस्तकालयका अध्यक्ष सुदेश वस्तीको अध्यक्षतामा भएको कार्यक्रममा लेटाङ ४ का वडाध्यक्ष राम कुमार श्रेष्ठ, वडासदस्यहरु चम्पा थापा मगर, सक्षम सुब्बा, एसभीएका प्रतिनिधि गणेश लामा, रिड नेपालका साजन थापा र एलवी भण्डारी लगायतको आतिथ्यता रहेको थियो ।
